Read Ibibiliya mu Shimakonde Imbodi Yaambi na dimbande dya Imbodi Yakala Vagalata 2 Bible Online

Vagalata 2 - Ibibiliya mu Shimakonde Imbodi Yaambi na dimbande dya Imbodi Yakala bible

Vagalata 2

¹Napanelo vikapite vyaka kumi na nsheshe, nindyúka kavili ku Yelusalemu pamo namu Balinaba, mushimwanda shosho ndímuukanavo Titu.

²Kwanavo nguukile kwamwaa wamaono kutwala kuvaigwiniya ntenga wambone wanguvalanganga kwavamidi, ndíikanavo kanji kwagweka avalá váshaaneka kuva vakuvaikila ngwambambidya nakapanji ninkutumbama kwali nditumbama yamonyo.

³Napane ata jo nyangu Titu wanguvénavo àvele avi ngalegu, hapali ámuungidile akumuligwe likumbi.

⁴Ing'ano ai ishashambwike na vanung'unumunu vakushang'apa vainjidíle na malotelo ashipiipii. Vanavo vandílijalanianga kwida ndapalalesha unaiti wetu watuvenavo nkati mumwe Klistu Yesu kwambangidya vatuukenavo muutumwa.

⁵Wetu hatulidabadabyénge kuvaigwilila vanavo kulamana na padyoko vela pakulota umwiu wantenga wambone uliikiniye kwenu mwenu.

⁶Napanelo avalá váshaaneka kuva vakuvaikila, shavavéle sho, kwangu nangu hashinava shinu mwaa Nnungu hanatanana kuvailanga kwamunu na vovo vo, hashipali shavangujanjadidye.

⁷Vanavo valakilé kwanjadedya kutwa kumanya do, ntenga wambone wo, ndikulupiligwa nangu kwavakakumuligwe kenga Patulu kwavakukumuligwa

⁸mwaa jo ákadile madengo kumwe Patulu aumyombe kwavayuda ni jojo ákadile kwangu nangu kwavamidi.

⁹Nadoni vamanya umonyo wangupatile, Tiyagu, Kepashi namu Nshuwau, vo váshaaneka kuva mabodo, vandítuwanidya makono akulodya upamo namu wetu, yani nangu namu Balinaba. Vanavo vandíkubali wetu tuve kwavamidi, vanavo kwavayuda

¹⁰ila hatunavalivalile vákave pashinu, ni shinu shanguvikidile namene kuntima na kutandedya.[11]

¹¹Napanelo Kepashi pawikile pa Antiyokiya nínshashulanga ngala kwamwaa wakutenda makosha.

¹²Mwaa vanu vanji vakwalakela kumwe Tiyagu vakanava kuwika, nae ashindalya na vamidi. Napane pavawikile vanavo, Kepashi andílyapula kutwala kulyumadyanga avajopa avalá váshishililidya likumbi.

¹³Namomo vayuda vanji uti vandílyunganianga namu Kepashi mo mushinankulaba, ata mpaka Balinaba momo andítwaligwa mushinankulaba shave.

¹⁴Bai pangugwene kenga havanauka shana nkati muumwiu wantenga wambone, ndímwaulila nae paumbala doni, “Wako umuyuda kanji unkunama kenga ummidi i kenga muyuda. Napane mwaa shani uvalamulila vamidi vaname kenga vayuda?”

¹⁵Wetu túvele tuvayuda kwashivalakwelo i vakutega vavamidi,[12]

¹⁶ata tumanya avi do, munu hanapata shinu ishaliya kwamwaa wakwodedya lilamulo ila kwaindila yakunkulupila Yesu Klistu, nawetu momo tuninkulupila Yesu Klistu pakulota tupate ishaliya kwaindila yakunkulupila Klistu i kwamwaa wakwodedya lilamulo. Ni doni, kwakwodedya lilamulo, hapali álota kupata ishaliya.

¹⁷Ikava kenga wetu tulambela tupate ishaliya nkati mumwe Klistu kutwa wewe momo kwaneka kuva tuvakutega,[13] da napane Klistu jo ntumika walidambi? I mwanavo!

¹⁸Mwaa ikava kenga avilá vyangubamalenge ninkunonowangidya kavili, bai ninkulilodya ngala kuva nimunu wakupujungula.

¹⁹Mwaa nangu kwaindila yalilamulo ndipela mulilamulo[14] kwambangidya nguname mu Nnungu. Nangu ndipela panshalaba namu Klistu.

²⁰Ninkunama kanji i nangu ila Klistu ni anama nkati mwangu.[15] Shingumi shanguvenavo mumili ambi apa, ninkunama kwakunkulupila Mwana wa Nnungu ángunagwaladidye na álijawile kwamwaa wangu nangu.

²¹Hangunavika shinu kunyenje umonyo wa Nnungu mwaa ikava kenga kwaindila yalilamulo munu ankupata ishaliya, bai Klistu apadilé monyo.