Read Ibibiliya mu Shimakonde Imbodi Yaambi na dimbande dya Imbodi Yakala Vagalata 3 Bible Online

Vagalata 3 - Ibibiliya mu Shimakonde Imbodi Yaambi na dimbande dya Imbodi Yakala bible

Vagalata 3

¹Mmagalata mmajinga mwe! Da mwenu annagwilé nyani, mwemwe wavammalangangidile ngala pamevo penu kenga Yesu Klistu andikamalalegwa panshalaba?

²Shangushilota ngumanye ni ashi, da Imumu jo, mumpwashaladile kwakwodedya lilamulo kwali kwalikulupililo kwa avilá vyamwigwite?

³Da mwenu mmajinga mmakumamodya? Shapo mundítunduvanga mu Imumu, napane ambi po mulyaladyanga dashi kwamili?

⁴Mwenu mundinama muvinu vyoe,[16] da muvinu avyo munamilé monyo? Davo, i mwanavo.

⁵Nnungu pampele Imumu na kutandedya vyadimongo pakati penu, da ni kwakwodedya lilamulo kwali kwalikulupililo kwa avilá vyamwigwite?

⁶Mo, “mwankulupilidile Abulaamu Nnungu na likulupililo lyolyo, Nnungu jo anímmalangilila Abulaamu kuva ishaliya”[17]

⁷manya doni, vo valikulupililo vo, vanavo ni udukulu umwe Abulaamu.

⁸Maandiko pagwene kaladavo doni, Nnungu andavapa vamidi ishaliya kwaindila yalikulupililo, anímmalangangila ntenga wambone shitandi Abulaamu aashidoni, “Kwako wako, venentete uti vandaalaligwa.”[18]

⁹Nadoni uti avalá vakulupíla, vandaalaligwa pamo namu aijá nkúkulupila Abulaamu.

¹⁰Mwaa uti avalá vakulupíla lilamulo vandilanigwa kwoda indyandikigwa doni, “Alaanigwe aijá ákapagwa muvinu avi uti vyandikígwe mulibuku lyalilamulo na vinu avyo me kutandedya.”[19]

¹¹Kanji napane inkuva ngala do, hapali álota kupata ishaliya pamevo pake Nnungu kwaindila yalilamulo mwaa “Waishaliya andanama kwalikulupililo.”[20]

¹²Doni, indila yalilamulo hainatakigwa shinu mulikulupililo ila “Jo átandedya vinu avyo, andanama.”[21]

¹³Klistu anditwambola mudilana dyalilamulo palitandile jo mwene kuva ilana adiva lyutu lyetu mwaa indyandikigwa, “Alaanigwe aijá álota kupambililigwa munnandi.”[22]

¹⁴Nae andilanigwa kwambangidya kwalaligwa kumwe Abulaamu kukavawikile vamidi nkati mumwe Klistu Yesu na kwalikulupililo tupwashalele kulivikila, kulivikila aku àvele Imumu.

¹⁵Mmanung'unumunu, ndavalanganga shinamidyo shetu wetu tuvanu. Ata pakave munu ápanga imbodi hapali ánatauka na wakwanjedya shinu shinji kavili.

¹⁶Kumwe Abulaamu kulivikila kunditangaleka; kutangaleke kwake nae namomo kwaudukulu wake. Nnungu hanatangola shinu doni, “kwavadukulumunu” kenga avamba vanu voe ila amwamba munu jumo doni, “kwandukuluvo”[23] yani Klistu.

¹⁷Shangutangola ni ashi, Nnungu papangile imbodi tangu kala, likaumilile lilamulo ling'oto lyavyaka dimiya nsheshe na selasini, halanatingudyanga shinu imbodi yo yakulota kutimbanga akulá kulivikila.

¹⁸Mwaa ikava kenga maleko[24] ankwodana na lilamulo bai hanatakigwa shinu kavili mukulivikila kanji ni kwaindila yakulivikila yampalalele Nnungu Abulaamu maleko alo.

¹⁹Napanelo shitadídye lipagwe lilamulo ni nyamani? Lyanavo lindyanjadyeka kwamwaa waukalau mpaka aide aijá ndukulumunu álota kupata akulá kulivikila.[25] Lilamulo lyo, lindikuvika kwaindila yavanjelo kupitila kumwe nkúdumangila.

²⁰Napane nkúdumangila hanava wamunu jumo kanji Nnungu avelé jumo.

²¹Da doni po lilamulo linkutaukanga kulivikila kwake Nnungu? Ata padyoko vela. Mwaa leka lìpagwite lilamulo líng'a shingumi, mwiu ishaliya ikandyalakela mulilamulo.

²²Kanji Maandiko alo anditadya[26] vinu uti vitawaligwe na lidambi pakulota kulivikila kwalakéla kwaindila yalikulupililo kumwe Klistu Yesu kukapatikanange na avalá vakulupíla.

²³Likulupililo likanava kuwika, tushindashungigwa mulilamulo, tùngwidye mpaka likulupililo alilá palyukile ndaunukuligwa.

²⁴Napavedoni lilamulo jo avele nkúlela wetu wakutuukanavo kumwe Klistu kwambangidya tupate ishaliya kwaindila yalikulupililo.

²⁵Likulupililo napane paliwikile, hatunava shinu kavili mmakono mwankúlela.

²⁶Mwaa mwenu uti mmanavake Nnungu kwaindila yalikulupililo nkati mumwe Klistu Yesu

²⁷mwaa uti múpatile ubatisho mumwe Klistu, Klistu muningwala.

²⁸Hapali muyuda na ata ngalegu, ntumwa na ata wamuunaiti, nnume kwali nkongwe mwaa uti mwenu ni munu jumo mumwe Klistu Yesu.

²⁹Ikava kenga mwenu ni mmake Klistu, bai mmadukuluvake Abulaamu na kwaupande wakulivikila wo, mmakupata maleko ni mwenu.