Read Ibibiliya mu Shimakonde Imbodi Yaambi na dimbande dya Imbodi Yakala Vagalata 4 Bible Online

Vagalata 4 - Ibibiliya mu Shimakonde Imbodi Yaambi na dimbande dya Imbodi Yakala bible

Vagalata 4

¹Napane shangwamba ambi apa, aijá nkúpata-maleko akava ndyoko, hanavilingananga shinu na ntumwa ata ikava kenga vinu vyo, vyàke.

²Jojo jo ankupagwa mukulalegwa na avalá vavakamudidye vyake mpaka wakati awo wavikile tatake.

³Nawetu momo patuvéle tuvadyoko tuvele muutumwa wamavalelo amushilambo ashi.

⁴Napane paukile ndawikila popo wakati we uvikíke, Nnungu anintumidya mwanagwe ávalakwadidye munkongwe na ávalakwadidye mukutawaligwa na lilamulo

⁵pakulota avaambole avalá ve vavéle mulilamulo kwambangidya tupate kuva tuvana va Nnungu.

⁶Pakuva mwenu po mmana, Nnungu anintumidya Imumu wamwanagwe mmitima mmyenu; ni jojo áshema, “Aba! Atata!”

⁷Napavedoni wako haunava shinu kavili untumwa ila umwana; ikava kenga ni umwana, bai ni gwegwe nkúpata-maleko kwaindila ya Nnungu.

⁸Mwiu, pamukashimmanya Nnungu, mushitandegwa vatumwa va avalá kwamavalelo havanava shinu vannungu

⁹kanji napane pamummanyite Nnungu apa, kwali tuushidoni mundimanyika na Nnungu, mwaa shani munkuujila kumavalelo lolo akudabadabanga na ákave lyululilo? Da mulota mutandegwe kavili mmatumwa?

¹⁰Mwenu munkutumbyanga namene pakati pamaduva anji, myedi, wakati na myaka![27]

¹¹Ninkunjapangila mwenu, inkulukika shimadengo shaninkalalele mwenu sho, kuva shamonyo.

¹²Mmanung'unumunu ninkunjugwa muve kenga nangu mwaa nangu momo nguvalalelé mo mwamuvalalele mwenu.[28] Hashipali shamungwanadile

¹³kenga mundimanya doni, ni mwaa wakudabadabanga kwamili shingutadídye nimmalangangile ntenga wambone kumwanda utandi

¹⁴na ata ikava kenga mili wangu wo uníntadya mwenu mulingigwe, hamungwiludyenge na ata hamungwitile. Mulakilé yakungwiludyanga kutwala kungupwashalela kenga njelo wa Nnungu kwali kenga jo mwene Klistu Yesu.

¹⁵Napanelo kwalaligwa kwenu ko kuvé pashi? Nangu ninkumya ushuda kenga muwakati aulá leka yùlulike mukandyushanianga mevo enu kutwala kungupa nangu.

¹⁶Da napane doni po nimmongo wenu kwamwaa wakummalangangila umwiu?

¹⁷Avalá vantanána mwenu, malotelo avo hanava shinu ambone. Vovo vo, valota vamwapukaniange namu nangu kwambangidya muvatanane vanavo.

¹⁸Ni shambone ngwengwe kutanana shinu shikava shambone i gweka nangu ngùpagwite namu mwenu.

¹⁹Mmanavangu, mwemwe mmanimuvauvangila kavili mauvilo alalá akuvaleka mpaka Klistu aliikiniye kwenu,

²⁰nikandipagwa namu mwenu ambi apa ngutangalele munji mwaa ninkwangaikanga yenu mwenu.

²¹Napanelo ngwaulila mwenu múlota mutawaligwe na lilamulo, da hamunaigwa shinu mwalitangalela lilamulo lyo?

²²Mwaa indyandikigwa doni, Abulaamu andívanavo vana vavili jumo wankongwe ntumwa, junji jo wamuunaiti.

²³Mwana wantumwa jo avalakwadidyé kwaindila yashimunumunu kanji wamuunaiti, nae avalakwadidyé kwaindila yakulivikila.

²⁴Vinu avi vinkuva mpano, vakongwe vavili ava vankwitika kuva dimbodi mbili. Imbodi imo yalishinga lya Shinai na inkuvavaleka vana vamuutumwa, aju ni Agali.

²⁵Agali ni lishinga lya Shinai livéle ku Alabiya liitíka kuva Yelusalemu yamaduvano mwaa yanavo inkupagwa muutumwa pamo na vanavake.

²⁶Kanji pane Yelusalemu yakuwa, yanavo ivé muunaiti, ayo ni jujuwetu.

²⁷Mwaa indyandikigwa doni, “Puwanga wako úkavaleka, gwegwe úkave mwana, umya lidi na kugwa, wako úkona kupwateka kwakuvaleka, mwaa vana vankongwe wavannakile vavelé voe, kuliko vana vankongwe ávele na ntwagwe.”[29]

²⁸Mmanung'unumunu, mwenu kenga Ishaki ni mmana mmakulivikila

²⁹napane kenga mo muwakati aulá, mwana ávalakwadidye kwaindila yashimunumunu ashinammingilidyanga mwana ávalakwadidye kwaindila ya Imumu, ni shosho shipagwíte ambi apa.

³⁰Kanji Maandiko ankushidashi? “Mmingange nkongwe ntumwa pamo na mwanagwe mwaa mwana wantumwa, mwiko hapata maleko pamo na mwana wamuunaiti.”[30]

³¹Mmanung'unumunu, pavedoni, wetu hatunava shinu tuvana vankongwe ntumwa ila vankongwe wamuunaiti.