Read Ibibiliya mu Shimakonde Imbodi Yaambi na dimbande dya Imbodi Yakala Vagalata 5 Bible Online

Vagalata 5 - Ibibiliya mu Shimakonde Imbodi Yaambi na dimbande dya Imbodi Yakala bible

Vagalata 5

¹Ivele mupagwe muunaiti shitadídye Klistu amwambole; napavedoni linatele, hamunatawaligwe kavili na likangoti lyautumwa.

²Igwa shana vyanimwaulila nangu Paulu, mukakumuligwa likumbi, bai Klistu havanavo shinu mana kwenu.

³Ninkwakikisha kavili kenga kula munu ákumuligwa likumbi, nae ankudaigwa atandedye lilamulo uti.

⁴Mwenu múlambela mupate ishaliya kwalilamulo, mundilyapula kumwe Klistu, mundipalanyoka muumonyo wa Nnungu.

⁵Mwaa kwa Imumu na kwaindila yalikulupililo wetu tunkulindila na mweshe lilindilililo lyakupata ishaliya.

⁶Mwaa nkati mumwe Klistu Yesu, kukumuligwa likumbi kwali mene, hakuve mana ila livé na mana ni likulupililo lililódya mulinagwaledyo.

⁷Mwenu mushindatumbama shana, napane nyani ándivilidile kwigwilila umwiu?

⁸Kushomba aku, hakunaalakela shinu kwa aijá ánshamile.

⁹“Nkukumuku padiki tu, undákukumuwa unga.”

¹⁰Nangu ninkuvanavo wakika nkati mumwe UMU kenga hamukumbukilila mushinu munji. Aijá ántindinganianga ata pakavéle nyani, andaukumigwa.

¹¹Mmanung'unumunu, ikava kenga nangu mpaka ambi ninkuvalanganga likumbi mwaa shani ninkupapatigwa? Leka ìvele davo, bai kunyatilika kwanshalaba kundiputangigwa.

¹²Kwaupande wa avalá vantindinganiánga, nangu ngushindalota mpaka vovo vo, valyune.

¹³Mmanung'unumunu, ivele mupagwe muunaiti shitadídye mushamegwe kanji napane unaiti awo haunave nkanidyo wakulota kutandedya malotelo enu ashimunumunu ila inimmaikila mutumikane shivenevene kwaindila yalinagwaledyo.

¹⁴Mwaa lilamulo uti vandiipiyanga mulilove limo, “Nnagwaledye mujo kenga mwaulinagwaladedya wako umwene.”[31]

¹⁵Kanji ikava kenga mwenu munkulumana na kumamanana shivenevene, lilaledye kwambangidya hamunabamalanange.

¹⁶Napane ninkumwaulila doni, nama kwa Imumu, apo mwiko hamuulula kutandedya malotelo ashimunumunu.

¹⁷Mwaa shimunumunu shinkuvanavo malotelo anyatilíka na Imumu na Imumu ankuvanavo malotelo anyatilíka na shimunumunu; vinu avi havinaigwana shinu, bai ni shamwona avilá vyamulota mwenu kutenda hamunaulule kutenda.

¹⁸Kanji mukalangalalegwa na Imumu, mwenu hamupali kavili mukutawaligwa na lilamulo.

¹⁹Napanelo vitendo vyashimunumunu vinkuva ngala; kulavalava, ushapu, njeje,

²⁰kulipudya kwavannungu vakushang'apa, wavi, umongo, ungaigwania, liu, shitundi, shojo, mitau, kumwadilikananga,

²¹ing'ou, kwambalwa, kululuka na vinji vilinganána na avyo. Ninkumwaulila kala davo kenga mwanimwaulidile kunantandi doni, vaténda vinu avyo, mwiko havapata maleko autawala wa Nnungu.

²²Kanji napane mapuno[32] a Imumu ni linagwaledyo, lipuwilo, amani, kupililila, kutanana, wambone, kukulupilika,

²³kulishapeya, kulishunga gwegwe umwene. Pakati pavinu avi, halipali lilamulo.

²⁴Vamwe Klistu Yesu, shimunumunu shave vandikamela panshalaba pamo na ditamaa na malotelo ake.

²⁵Tukanama kwa Imumu, bai tupagwe momo munkondo wa Imumu.

²⁶Hatunalyone, hatunaangangane na ata hatunavikanile ing'ou.