Read Ibibiliya mu Shimakonde Imbodi Yaambi na dimbande dya Imbodi Yakala Vagalata 6 Bible Online

Vagalata 6 - Ibibiliya mu Shimakonde Imbodi Yaambi na dimbande dya Imbodi Yakala bible

Vagalata 6

¹Mmanung'unumunu, munu akapatikana mukupujungula kwoekwoe, mwenu mmaimumu mùvele mwimumu yakulishapeya, nningule munu ajo mulishunga kwambangidya namwenu momo hamunatubigwe.

²Nyakulanila dibasha dyenu; mukatenda davo, mundatandedya lilamulo lyake Klistu.

³Munu akalyona kuva munu shii kanji akavé, ankulishang'apila jo mwene.

⁴Kula munu alalyange vyo vitendo vyake mwene; apo ni palota kulitamanga jo mwene i kwamunu junji

⁵mwaa kula munu andanyakula ibasha yake.

⁶Aijá ápundishigwa mulilove, inimmaikila amajanange avilá vyambone uti[33] namu aijá ámpundisha.

⁷Hamunaduwangike, Nnungu hanaliulika. Shalota kupanda munu ni shosho shalota kupuna.

⁸Álota kupanda kwashimunumunu, vyashimunumunu andapuna; napane álota kupanda kwa Imumu, andapuna shingumi shíkamalilika.

⁹Hatunadobe kutenda wambone mwaa tukanadabadabangila, pauwika wakati wake po, tundapuna.

¹⁰Napanelo po patuvenavo litala lyakutandela wambone, tutandedye kwavanu uti kanji kupunda namene avalá vamwing'ande yalikulupililo.

¹¹Lola dinembo ding'umene dyanimwandikila na wo nkono wangu nimwene.

¹²Napane uti avalá valóta valyaneshe wambone mumili, avo ni vamuungíla mwenu mukumuligwe likumbi kwambangidya bai havanapapatigwe kwamwaa wanshalaba umwe Klistu.

¹³Ata vo vakumuligwa likumbi vo, havanaodedya shinu lilamulo ila vannota vankumule likumbi kwambangidya valishibangile kwa ashilá shivéle mumili mwenu.

¹⁴Nangu mwiko hangunalishibangile paikava kwanshalaba umwe UMU wetu Yesu Klistu mwaa kwaindila yanshalaba wo, shilambo shindikamalalegwa kwangu nangu na nangu ndikamalalegwa kwaupande washilambo.

¹⁵Kukumuligwa likumbi kwali mene hakunapagwa mana. Shamana ni kuva shiumbi shaambi.[34]

¹⁶Amani na shididi vipagwe na avalá vavéle munkondo walipata ali, vipagwe na yo Ishilaeli ya Nnungu.[35]

¹⁷Kumwisho akuno, hanapagwe wakungudingadinga mwaa mumili mwangu ninkuvanavo vimanyikilo vimwe Yesu.

¹⁸Mmanung'unumunu, umonyo umwe UMU wetu Yesu Klistu upagwe na imumu yenu. Ame.