Read Ibibiliya mu Shimakonde Imbodi Yaambi na dimbande dya Imbodi Yakala Vaepeshu 1 Bible Online

Vaepeshu 1 - Ibibiliya mu Shimakonde Imbodi Yaambi na dimbande dya Imbodi Yakala bible

Vaepeshu 1

¹Paulu, myombe umwe Klistu Yesu kwalilotelo lyake Nnungu kwavakwilimyanga vapágwa ako ku Epeshu, vo vakukulupilika nkati mumwe Klistu Yesu.

²Umonyo upagwe kwenu mwenu na amani yakwalakela kwa Nnungu Tatagwetu na kumwe UMU Yesu Klistu.

³Atumbyangilike Nnungu umwe UMU wetu Yesu Klistu, jo Tatamunu wake nae, átwalalidye nkati mumwe Klistu kwakwalaligwa uti kwaimumu mumautu akuwa

⁴kenga mo mwatutandaladile nkati mwake tangu kala shilambo shikanava kukandyangigwa pakulota tuve vakwilimyanga na túkave makosha pamevo pake. Nae anditutandola mulinagwaledyo[1]

⁵àtupangidile kala mwakulota kututenda tuvanamunu vake jo mwene kwaindila imwe Yesu Klistu kwodana na mo mwainagwaladile jo mwene mumalotelo ake

⁶kwakutumbyangilika kwalishangelo lyaumonyo wake watutanene nkati mumwe Wakunagwaleka.

⁷Nkati mwake tundivanavo kwambola kwaindila yamyadi vyake kùvele kulivalivigwa kwakupujungula kwodana na kuumbaligwa kwaumonyo wake Nnungu.

⁸Wowo wo andimiminila kwetu wetu nkati mulimanyilo na umanyimanyi

⁹atadya tumanye shipii shamalotelo ake kwodananavo mwainagwaladile, mo mwalatalele mwene atende nkati mumwe Klistu

¹⁰kenga nnugu wakulota kutandeka wakati ukawikila popo pakulota aunganiange vinu uti nkati mumwe Klistu, vinu vivéle kuwa na vinu vivéle pai.

¹¹Nkati mwake momo wetu tunditandegwa kuva maleko, wewe tùpangiligwe kala kwodananavo ishabaa yake aijá átenda vinu uti kwauwamushi wamalotelo ake

¹²pakulota tupagwe kwakutumbyangilika kwalishangelo lyake, wetu tuvatandi túnkulupidile Klistu.

¹³Nkati mwake namwenu momo pamwigwite ntenga waumwiu, ntenga wambone wo umwambwéle; mwenu múnkulupidile nae, mundinamatiligwa kwa Imumu Wanashwe wakulivikila,

¹⁴nae jo àvele kulivikila kutandi kwamaleko etu mpaka kwambwalegwa kwa avalá vake Nnungu kwakutumbyangilika kwalishangelo lyake.

¹⁵Napavedoni tangu pangwigwite itangaleka pakati penu yalikulupililo kumwe UMU Yesu na yalinagwaledyo kwavakwilimyanga uti,

¹⁶hangunaleka shinu kulambwalela kwamwaa wenu mwenu nintambulanga mukushwali kwangu.

¹⁷Ndájugwa doni, Nnungu umwe UMU wetu Yesu Klistu, Tatamunu Walishangelo, amupe imumu yalimanyilo na yamaono nkati mukummanya shana nae[2]

¹⁸alangadya mitima vyenu pakulota mumanye nyamani lilindilililo lyakushema kwake, nyamani kuumbaligwa kwalishangelo lyamaleko ake kwavakwilimyanga

¹⁹na nyamani ukumene wadimongo dyakupunda uti kwetu wetu túnkulupidile. Dimongo adi dinkulinganana na shimadengo shakunanopa kwalyululilo lyake

²⁰likadíle madengo nkati mumwe Klistu muwakati wandyuwidye pakati pavakupela na pantadidye kwikala kunkanakono kwake mumautu akuwa,

²¹kwikala pashanya uti pautawala, madalaka, dimongo, sheo na pashanya pamena uti avatambulanga, i gweka muwakati au kanji na yadavo muwakati wída.

²²Nae andivika vinu uti mmadodo mwake kutwala kunjaula kuva kenga nangangonda wavinu uti kwaliganisha,

²³liganisha lyo ùvele wo mili wake; kuumbala kwa aijá áumbadya uti kwauti.