Read Ibibiliya mu Shimakonde Imbodi Yaambi na dimbande dya Imbodi Yakala Vaepeshu 2 Bible Online

Vaepeshu 2 - Ibibiliya mu Shimakonde Imbodi Yaambi na dimbande dya Imbodi Yakala bible

Vaepeshu 2

¹Mwenu po muvele mukupela nkati mukupujungula na mumadambi.

²Muvinu avyo, mwenu mushindanama kwodana na inamuna yashilambo ashi na kwodana na nkútawala wamadalaka akuniania, imumu ikóla ambi apa madengo muvakaigwilila.

³Pakati pave nawetu momo tushindalilangalalela kwamalotelo ashimunumunu, tutandedya malotelo amili na anding'anong'ano. Nadoni kenga vanji uti, nawetu momo kwashimunumunu tundípagwa mushitundi shake Nnungu.

⁴Napane Nnungu wakuumbaligwa shididi, kwalinagwaledyo lyake likumene lyatunagwaladidye,

⁵ata ikava kenga wetu tuvele mukupela nkati mukupujungula, nae anditupa shingumi pamo namu Klistu; doni, mundyambwalegwa kwaumonyo.

⁶Anditudyuwa namu nae na anditutadya namu nae twikale mumautu akuwa nkati mumwe Klistu Yesu

⁷kwambangidya muwakati wída, nae alodye umbala wamali aumonyo wake mulitananilo lyake kwetu wetu nkati mumwe Klistu Yesu.

⁸Mwaa mundyambwalegwa kwaumonyo kwaindila yalikulupililo; asho hashinaalakela shinu kwenu mwenu, ni inudyo ya Nnungu.

⁹Hashinava shinu shaudukilidile munu[3] pakulota hanalitumbyangidye munu woewoe.

¹⁰Mwaa wetu ni viumbi vyake Nnungu túkandyangigwe nkati mumwe Klistu Yesu kwavitendo vyambone vyapanganienge tangu kala wetu tuname muvyanavo.

¹¹Napavedoni mwenu kumbukila doni, mwemwe mwe muvéle mmamidi kwamili, múshishamegwa mmashungu kwa avalá vashamégwa vakukumuligwa, shinu shavatenda mumili na makono,

¹²inimmaikila mukumbukile doni, muwakati awo mwenu hamuvénavo Klistu, hamushivalangiligwa muuwenentete washiishilaeli, muvele múkamanyika nkati mudimbodi dyakulivikila; mmanu múkave lilindilililo na múkave Nnungu mushilambo amu.

¹³Kanji napane nkati mumwe Klistu Yesu, mwenu mwe muvéle kushu munditadya muvé pepi kwaindila yamyadi vimwe Klistu.

¹⁴Mwaa jo mwene ni amani yetu. Nae andivatenda vanu vavili kuva shinu shimo na kwaindila yamili wake andibamola lishiti lyapakati, aulá umongo

¹⁵aputanga ishaliya yalóka mulilamulo inanapela muvyakulamulila.[4] Nae atandilé davo pakulota vavili ava nkati mwake avatende kuva munu jumo waambi atandedya amani

¹⁶na pakulota nae avaunganiange vavili ava mumili umo kwa Nnungu kwaindila yanshalaba amalidya umongo.

¹⁷Nae aidilé ndavalanganga amani kwenu mwenu mwe muvéle kushu na amani kwa avalá ve vavéle pepi;

¹⁸doni, kwaindila yake nae wetu tuvavili tunkuulula kumuukila Atata nkati mu Imumu jumo.

¹⁹Napavedoni mwenu hamunava shinu múkamanyika na ata hamunava shinu mmapanda kanji ni mmenentetemwagwe mmakwilimyanga na mmamwing'ande yake Nnungu.

²⁰Mundidangegwa pashanya vamyombe na vakulava, lijanga likumene lyashitunduvangilo kuva Klistu.

²¹Nkati mwake, ing'ande uti pavanaunganianga indákulumuka ndava lyutu lya Nnungu lyakwilimyanga nkati mumwe UMU.

²²Namwenu momo nkati mwake munkudangegwa pamo pakulota muve lyutu lya Nnungu kwaindila ya Imumu wake.