Read Ibibiliya mu Shimakonde Imbodi Yaambi na dimbande dya Imbodi Yakala Vaepeshu 4 Bible Online

Vaepeshu 4 - Ibibiliya mu Shimakonde Imbodi Yaambi na dimbande dya Imbodi Yakala bible

Vaepeshu 4

¹Napavedoni nangu nkúngwa umwe UMU, ninkunnaililila muname shinamidyo shivaikidíle nkati mukushamegwa akulá kwamushamagwidye;

²pagwa mukulishapeya, mukupambadyanga na muupole mupilililanila mulinagwaledyo

³muvanavo ntima wamalotelo akushunga upamo wa Imumu kwaindila yakuungana kwaamani.

⁴Unkupagwa mili umo na Imumu jumo kenga mo mwavanshamalele mwenu kwalilindilililo limo lyakushamegwa kwenu,

⁵UMU jumo, likulupililo limo, ubatisho umo,

⁶Nnungu jumo na Tatamunu wauti, jo ápagwa pashanya pauti, ápagwa mumautu uti na ápagwa nkati muuti.

⁷Napane kwetu wetu kula munu andipata umonyo kwodananavo shipimo shanjavidile Klistu.

⁸Ni ashi shitangaléke, “Pakwadile kuka kushanya, andilangalalela shipinga shikumene shamatondo na kuvapa vanu dinudyo.”[6]

⁹Inkuvanavo mana shani, “Nae andikwela?” Inkuvanavo mana kenga andíshuluka momo mpaka isemu yamwina, mushilambo shapai.

¹⁰Aijá áshulwike ni jojo ákwadile pashanya pakuwa-uti kwambangidya aumbadye vinu uti.

¹¹Ni jojo ávapele vanji kuva vamyombe, vanji kuva vakulava, vanji kuva vakuvalanganga ntenga, vanji kuva vashungaji na vanji kuva vamwalimu

¹²pakulota ivé dashi, vavapanganiange vakwilimyanga kwashimadengo shautumika kwakudenga mili umwe Klistu

¹³mpaka uti tuwikile muupamo walikulupililo na walimanyilo lya Mwana wa Nnungu; doni, mpaka tukave tuvanu tuvakukamala túwikidile shipimo shashilinga shaumbala umwe Klistu

¹⁴kwambangidya dashi, hatunave tuvadyoko túgang'alegwa na mawimbi na tuvambaluwigwa kwakula imepo yamapundisho kwaujanja wavanu vaodédya mukuduwanga milugu vyakushang'apa.

¹⁵Napane patukamulila umwiu nkati mulinagwaledyo, indituvaikila tukulumuke tùpagwite mwake nae muvinu uti, aijá ávele muti, jo Klistu aju.

¹⁶Kwaindila yake nae mili uti paulyunganianga na paukamulananga na kula imbandi yavampele, kula imbandi paikola shimadengo muvaikidíle, inátadya mili ukulumuke pakulota ulidenge mulinagwaledyo.

¹⁷Nadoni ninkutangola na ninkumya ushuda nkati mumwe UMU, hamunaname kavili kenga mmamidi mukunyambikanga makumbukililo ave.

¹⁸Vanavo muding'anong'ano dyave vankupagwa mushii vavikigwa panda mushingumi sha Nnungu kwamwaa waungamanya upagwíte kwavanavo walakéla nkati mukunanopa kwamitima vyave.

¹⁹Vanavo vo vanditadya kukamaligwa na kulyumadyanga nkati mudyoni kutwala kuliinjidyanga mukulauka vatenda kwashipuva kula shinu shaushapu.

²⁰Kanji kwaupande wenu mwenu, i mwanavo mwamulipundishididye Klistu,

²¹ikava kenga mwiu mwenu mundigwa itangaleka mwaa wake na mundipundishigwa nkati mwake kwodananavo umwiu upagwíte nkati mumwe Yesu aju,

²²kwaing'ano yamavalelo akala, mupundishigwidyé kumula munu wenu wakala, munu jo abamalegwa na malotelo akushang'apa,

²³kunnonowanga kavili mwimumu yamakumbukililo enu

²⁴kutwala kungwala munu waambi ákandyangigwe kwakulinganana namu Nnungu nkati mwishaliya iu na nkati mukwilimyanga kwiu.

²⁵Napavedoni, pamulakile kushang'apa, inimmaikila kula munu atangole umwiu kwanshitanono wake mwaa wetu uti ni mili umo.

²⁶Shimwa na hamunatege.[7] Hamunaleke liduva lidimba mushimwidye

²⁷na hamunamupe Ndamoni litala.

²⁸Áshiva, hanaive kavili ila akole madengo atenda shinu shambone kwamakono ake pakulota dashi, apate ashilá shakumpwashela aijá ákave pashinu.

²⁹Malove akunyatanga hanaume nkanywa mwenu ila aume malove ambone avaikidíle kuvadenga vanu kwodananavo malotelo ave kwambangidya malove enu ape umonyo kwa avalá vaígwa.

³⁰Hamunantae shipalodi Imumu Wanashwe wa Nnungu, jo wavannamatididye mwenu mpaka muliduva lyakwambola.

³¹Shijaujau, kushimwa, shitundi, kunyonya na kwabola; vinu avi uti pakati penu havinapagwe pamo na wakunyata uti.

³²Tananana na ava mmashididi mulivalilanila kulingana kenga mo mwannivalidile mwenu Nnungu nkati mumwe Klistu.