Read Ibibiliya mu Shimakonde Imbodi Yaambi na dimbande dya Imbodi Yakala Vaepeshu 5 Bible Online

Vaepeshu 5 - Ibibiliya mu Shimakonde Imbodi Yaambi na dimbande dya Imbodi Yakala bible

Vaepeshu 5

¹Napavedoni ava mmakunjedya Nnungu kenga mmana mmakunagwaleka

²na nama mulinagwaledyo kenga Klistu anditunagwaledya kutwala kulyumya jo mwene yetu wetu kuva inudyo na shadaka shinung'angíla kwa Nnungu.

³Kulauka, ushapu kwali lung'unuku; pakati penu hanapagwe wakwambangila mwaa kenga mwaivalalele kwavakwilimyanga

⁴ata malove akunyata, aujinga na antau ákavaikidile kanji paikave davo po, kupagwe kulambwalela.

⁵Mwaa mumanya ngala doni, nkúlauka, nshapu kwali walung'unuku, jo wakulipudya vyakushang'apa, aju have maleko muutawala umwe Klistu namu Nnungu.

⁶Hamunanneke munu anduwanga kwamalove ashing'alang'ala; kwamwaa wavinu vyovyo vyo, vinkutadya shitundi shake Nnungu shivawikile avalá vákaigwilila.

⁷Napavedoni hamunalyunganiange na vanavo muvinu avyo.

⁸Mwenu kala muvele shii, napane ambi apa ni lilangadyo nkati mumwe UMU bai nama kenga mmana mmalilangadyo,

⁹shepo shalilangadyo shivéle nkati muwambone, mwishaliya na muumwiu,

¹⁰mwenu likanyalidye kupambula ashilá shinnagwéla UMU.

¹¹Hamunaliinjidyange muvitendo vyamushii víkave vyepo kanji paikave davo po, kashaulanga.

¹²Mwaa avilá vyavatenda vanavo kwashipii ata ko kuvalanganga aku, vinkutaa dyoni.

¹³Kanji vinu uti vikakashauligwa na lilangadyo vindáaneka

¹⁴mwaa uti avilá vyúka ndatadya vyaneke ni lilangadyo. Ni ashi shitádya itangaleke doni, “Imuka wako úlala, takatuka pakati pavakupela na Klistu andakumulikila.”

¹⁵Lilaledye shinamilo shamunama; i kenga shavajinga kanji shammanu mmalimanyilo

¹⁶mutumila shana wakati wamuvenavo mwaa maduva ala, andinyatanga.

¹⁷Napavedoni hamunave mmajinga kanji manya malotelo ake UMU ni akwashi.

¹⁸Vinyu hamunaambalwe mwaa momo mo, munkupagwa kulauka kanji umbaligwa na Imumu

¹⁹mutangola shivenevene mudimu, mukutumbyanga na muvyakwimba vyaimumu, mwimba na mushonga dimu mmitima vyenu kumwe UMU,

²⁰munnambwalela ngwengwe vinu uti Nnungu Atata palina limwe UMU wetu Yesu Klistu,

²¹kula munu alivika mwina mwamuje kwakumwishimu Klistu.

²²Mmadyamunu, kula munu alivike mwina mwantwamunu kenga mo mwaivalalele kumwe UMU

²³mwaa ntwamunu ni muti wandyamunu kenga mo mwavalalele Klistu muti waliganisha, jo mwene àvele mwamboli wamili.

²⁴Nadoni kenga mo mwalilivikila liganisha mwina mumwe Klistu, namomo mwenu mmadyamunu livike muvinu uti mwina mwavatavenu.

²⁵Mmatwamunu, kula munu annagwaledye ndyagwe kenga mo mwanagwaladyedya Klistu liganisha kutwala kulijaula kwamwaa walyanavo

²⁶pakulota atadye kuva lyakwilimyanga paushanienge ushapu kwakuukanga na medi kwaindila yalilove

²⁷kwambangidya alikamudye jo mwene liganisha lyalishangelo, líkave lilemba na ata unyadi kwali vinu vyoevyoe kenga avyo kanji lyakwilimyanga na líkave makosha.

²⁸Ni kenga momo vatwamunu vavanagwaledye vadyavave kenga wo mili wave vene. Ánnagwaledya ndyagwe, ankulinagwaledya jo mwene.

²⁹Mwenu, hapali munu ánanyatila mili wo wake mwene kanji shitandi análisha na kutatana kenga mo mwatandela Klistu liganisha

³⁰mwaa wetu ni dimbandi dyamili wake.

³¹“Napavedoni nnume ananneka tatake na anyoke kuka ndalyunganianga na ndyagwe kutwala vavili ava kuva mili umo.”[8]

³²Shipii ashi shikumene kanji nangu ninkushidoni shaambíka apa shimwamba Klistu pamo na liganisha.

³³Kanji napane namwenu kula munu annagwaledye ndyagwe kenga mo mwalinagwaladyedya jo mwene na ndyamunu amwishimu ntwagwe.