Read Ibibiliya mu Shimakonde Imbodi Yaambi na dimbande dya Imbodi Yakala Vaepeshu 6 Bible Online

Vaepeshu 6 - Ibibiliya mu Shimakonde Imbodi Yaambi na dimbande dya Imbodi Yakala bible

Vaepeshu 6

¹Mmana, vaigwilile vatatavenu nkati mumwe UMU mwaa amu ni muvaikidíle.

²“Mwishimu tatako na anyoko,” lilamulo litandi liidanavo kulivikila

³“kwambangidya vinu vikuukile shana na uname wakati woe mushilambo.”[9]

⁴Namwenu mmatatamunu, hamunavatae shitundi vanavenu kanji valele mumapundisho na mukuduma kwake UMU.

⁵Mmatumwa, vaigwilile vanang'olo venu vamushilambo mujopa na mutatamela kwantima shii kenga pakavele Klistu,

⁶i mwaneke pakulota ivanagwele vanu kanji kenga vatumwa vamwe Klistu mutenda malotelo a Nnungu mmitima vyenu

⁷mutumika kwantima wadukuduku kenga muntumika UMU i kwavanu.

⁸Manya kenga shoeshoe shambone shatenda munu, shosho sho andapata kwalakela kumwe UMU ata pakavele ntumwa kwali wamuunaiti.

⁹Namwenu mmanang'olo, vatandele momo vatumwa venu na leka kutishanga kwenu mumanya kenga aijá ávele nang'olo wave na nang'olo wenu mwenu uti avelé kuwa na kwake nae, hakupali kupambula.

¹⁰Kumwisho akuno ling'e dimongo nkati mumwe UMU na nkati mukunanopa kwalyululilo lyake.

¹¹Gwalangila vyaing'ondo uti vimwe Nnungu pakulota muulule kwimila mupinga mitego vimwe Ndamoni

¹²mwaa ing'ondo yetu hainava shinu yakupingana na munu kanji ni kupinga dimongo dyautawala, kupinga dimongo dyamadalaka na kupinga dimongo dyamushilambo uti mushii ashi shawakati au, kupinga dimongo dyadimumu dyaukalau mumautu akuwa.

¹³Napavedoni nyukatanga vyaing'ondo uti vimwe Nnungu pakulota muliduva alilá lyaukalau muulule kunanopa na pamumalididya uti muke mushu mwimidile.

¹⁴Nadoni imila mùlyungile nkanda waumwiu, mùgwete pashuva shikopa shaishaliya

¹⁵na mmadodo mwenu, mùgwete ntenga wambone waamani mwìmidile do, go mulyutu lyakunanopa.[10]

¹⁶Kwavinu avyo uti, mùnyukete shikopa shalikulupililo; shanavo mundaulula kudima myumba vyamoto vimwe aijá nkalau.

¹⁷Twala shijulu shashitali shakwambola na lyambila lya Imumu lìvele lilove lya Nnungu.

¹⁸Kwakula inamuna yakushwali na kujugwa, shwali kula wakati mu Imumu. Kwadoni, ava mevo mulipililila uti mushwali muvajugwila vakwilimyanga uti

¹⁹namomo mungujugwila nangu kwambangidya dashi ndikashimula ikanywa, ngupate malove pakulota ndivamanyiye vanu na ntima washinannume shipii shantenga wambone,

²⁰wo wanguvele nangu baloshi vànguungile mang'unyang'unya, nguvalangangile na ntima washinannume amulá muvaikidíle ngutangole.

²¹Napanelo Tikiku nung'unumunu wakunagwaleka na walikulupilika, ntumika umwe UMU, anammanyiya uti pakulota mwenu momo mumanye vinu vingwámba nangu na nyamani shangutenda.

²²Nintumididyé kwenu kwaing'ano ai kwambangidya mwenu mumanye vinu vitwámba wetu na amupe ntima shii.

²³Amani ipagwe kwavanung'unumunu, namomo linagwaledyo pamo na likulupililo lyakwalakela kumwe Nnungu Atata na kumwe UMU Yesu Klistu.

²⁴Umonyo upagwe na avalá uti vannagwalédya UMU wetu Yesu Klistu kwalinagwaledyo líkave mwisho.