Read Ibibiliya mu Shimakonde Imbodi Yaambi na dimbande dya Imbodi Yakala Vapilipo 3 Bible Online

Vapilipo 3 - Ibibiliya mu Shimakonde Imbodi Yaambi na dimbande dya Imbodi Yakala bible

Vapilipo 3

¹Napanelo kumwisho akuno mmanung'unumunu puwanga nkati mumwe UMU! Kumwandikila kavili mwenu malove lolo hashinangukamadyangidya shinu kwangu nangu ila shosho sho ni lishililidyo kwenu mwenu.

²Lishunge kwa avalá vang'avanga. Lishunge kwa avalá vaténda ukalau. Lishunge kwa avalá vaanónga mili.

³Mwaa wetu ni likumbi shii túlipudya kwa Imumu umwe Nnungu túlitumbyangidya nkati mumwe Klistu Yesu na túkakulupila vyamumili,

⁴ata ikava kenga nene nimwene ninkuvanavo shaliya yakukulupila vyamumili. Ikava kenga woewoe ankwona kuvanavo shaliya yakukulupila vyamumili, bai nangu nimpomo:

⁵kwaing'ano yalikumbi, nangu ni nimunu wakukumuligwa muliduva lyanane, wamulikola lyavanaishilaeli, wamulutumbo lwavanabenjameni, mbalaniya mwiu; kwalilamulo, mpalishayo;

⁶kwaidukuduku, nkúpapata liganisha; kwaishaliya ipagwíte mulilamulo, ákave makosha.

⁷Kanji napane ashilá shíshiva paida kwangu, ninkwona kuva shakujaika kwamwaa umwe Klistu.

⁸Ata kwakupunda apo, ninkwona vinu uti kuva vyakujaika kwamwaa waukumene wakumamodya walimanyilo limwe Klistu Yesu UMU wangu, aijá waninjaikangila vinu uti. Avyo uti ninkwona kuva dinywashwa kwambangidya nimpate Klistu

⁹na ngunanapele nkati mwake pandikavenavo ishaliya yangu nene nimwene yakwalakela mulilamulo kanji yakwalakela kwaindila yakunkulupila Klistu, ishaliya ailá yalakéla kwa Nnungu na inanapéla mulikulupililo.

¹⁰Ngulota nimmanye Klistu, ngumanye dimongo dyakudyuka kwake na ngupagwe muupamo wamauvilo ake ngulinganana namu nae mukupela kwake

¹¹pakulota kwadindila dyoedyoe nguulule kuwikila kwangupata kudyuka pakati pavakupela.

¹²I do nangu ndivanavo tayali asho na ata kwali ndiva tayali washalowa-uti kanji ninkuka mushu ngulikanyalidya pakulota nguulule kukamula ashilá, sho shangukamulidile nangu Klistu Yesu.

¹³Mmanung'unumunu, hangunakumbukila shinu kenga ndikamula tayali shinu ashi kanji shinu shimo shangutenda, ninkulivaliva vyapanyuma kutwala kunyulukila vyamushu.

¹⁴Nguka mushu ngulikanyalidya ndikawikile shabaa yainudyo yakushema kwake Nnungu kwalakéla kuwa nkati mumwe Klistu Yesu.

¹⁵Napavedoni uti wetu túlota tuve tuvashalowa indituvaikila tukumbukile doni, ikava kenga apali ákumbukilila munji, ajo Nnungu andamuunukulila shinu asho.

¹⁶Napane ashilá shatuulwile, shosho sho twode.

¹⁷Mmanung'unumunu, ungana mutwale mungujedye na muvalole avalá vanáma kwakulinganana na mpano wamuvenavo mwenu kwetu wetu.

¹⁸Mwaa voe vanishimwaulila myanda vyoe na vandimwaulila ambi apa kwamyodi, vankunama kenga vammongo wanshalaba umwe Klistu.

¹⁹Vanavo mwisho wave ni kubamalegwa, nnungu wave ni shitumbo na lishangelo lyave linkupagwa mudyoni dyave vakumbukila vinu vyamushilambo tu bai.

²⁰Kanji wenentete wetu wetu uvelé kuwa akulá kwatunnindila na dukuduku mwamboli, UMU Yesu Klistu.

²¹Nae andabadilisha mili vyetu vyakudabadabanga kutadya vilinganane na mili wake walishangelo kwaindila yadimongo dintádya aulule kuvika vinu uti mwina mwake.