Read Ibibiliya mu Shimakonde Imbodi Yaambi na dimbande dya Imbodi Yakala Vapilipo 4 Bible Online

Vapilipo 4 - Ibibiliya mu Shimakonde Imbodi Yaambi na dimbande dya Imbodi Yakala bible

Vapilipo 4

¹Napavedoni mmanung'unuvangu mwenu mmaninnagwaledya mwemwe wanguvenavo mweshe, mùvele lipuwilo lyangu na lidaka lyangu, imila dadoni mukunanopa nkati mumwe UMU, mwenu mmakunagwaleka vangu.

²Napanelo shandivajugwangila Evodiya namu Shintike ni shinu shimo shosho, vaigwanie nkati mumwe UMU.

³Mwiu, namomo ninkukujugwa wako unyangu wakukulupilika nguushidoni, vapwashele vamama ava. Vanavo vandilyuvyauvyanga namu nangu muntenga wambone pamo namu Kalamende na vamadengomwangu vabakadíle vo. Mena ave ankupagwa mulibuku lyashingumi.

⁴Puwanga ngwengwe nkati mumwe UMU. Ninkuujila kavili nguushidoni, puwanga!

⁵Wambone wenu[4] umanyike kwavanu uti. UMU avé pepi.

⁶Hamunangaikange kwamwaa washinu shoeshoe kanji kwakula shinu, kwaindila yakushwali na yakujugwa pamo na kulambwalela, palakedya majugwilo enu kwake Nnungu

⁷na amani ya Nnungu ipúnda ding'anong'ano uti indashunga mitima na ding'ano dyenu nkati mumwe Klistu Yesu.

⁸Kumwisho akune mmanung'unumunu, vyoevyoe uti vyaumwiu, vyoevyoe vyaishima, vyoevyoe vyaishaliya, vyoevyoe víkave ushapu, vyoevyoe vyakwalala, vyoevyoe vyashimbili na ikava kenga vipali vivaikidíle kutumbyanga, vinu avyo vikila kuntima.

⁹Avilá vyamulipundishidye, vyamupatile, vyamwigwite na vyamugwene kwangu nangu, vinu avyo tandedya na Nnungu waamani andapagwa namu mwenu.

¹⁰Napanelo ninkupuwanga namene nkati mumwe UMU kwamwaa wenu mwenu wamuliladidye kavili kungutanana nangu. Kwaumwiu, mwenu mushinangukumbukila ila hamushivanavo litala lyakulilodya.

¹¹Hangunatangola shinu yakungwova shoeshoe mwaa ndilipundisha kulishika muvyoevyoe.

¹²Ndimanya mwakukatakela uti na ndimanya mwakuumbaligwidya. Nkati muuti ndilipundisha shipii; nkati mukwikuta na nkati mukudoba indala, nkati mukuumbaligwa na nkati mukwova vinu.

¹³Uti ninkuulula kutandedya nkati mwake aijá ángupa dimongo.

¹⁴Ata ive davo, mwenu munditandedya wambone kwakuliinjidyanga mumauvilo angu.

¹⁵Mwenu mmapilipo mundimanya shana kenga kukutunduvanga ntenga wambone panguukile ku Makedoniya halipali liganisha liliinjidyénge mwing'ano yakujaula na yakupwashalela ila ni gweka mwenu.

¹⁶Mwaa ata nguvé ku Teshalonika mwenu munditumidya lipwashalelo kwa avilá víshingwova na i mwanda umo.

¹⁷I do, ninkulambela shadaka shenu kanji shangulambela ni vyepo vyakwanjedya paida yenu.

¹⁸Nangu ndivanavo uti na ndyumbala. Ndilinganana pangupatile kumwe Epapoloditu avilá vyaléke kwenu; avyo ni kunung'angila kwambone, shadaka shakukubalika shinnagwéla Nnungu.

¹⁹Nnungu wangu andalinganianga uti avilá vyamulota kwautajili wavenavo mulishangelo nkati mumwe Klistu Yesu.

²⁰Kumwe Nnungu wetu na Tatagwetu lipagwe lishangelo ngwengwe ngwengwe. Ame.

²¹Vape nandele vakwilimyanga uti nkati mumwe Klistu Yesu. Vanung'unumunu vapágwa namu nangu, vankuntumidya nandele.

²²Vakwilimyanga uti vankuntumidya nandele kupunda namene vapágwa paing'ande imwe Shashali.

²³Umonyo umwe UMU wetu Yesu Klistu upagwe mushingumi shenu.