Read Ibibiliya mu Shimakonde Imbodi Yaambi na dimbande dya Imbodi Yakala Vakoloshu 1 Bible Online

Vakoloshu 1 - Ibibiliya mu Shimakonde Imbodi Yaambi na dimbande dya Imbodi Yakala bible

Vakoloshu 1

¹Paulu, myombe umwe Klistu Yesu kwalilotelo lyake Nnungu namu nung'unumunu Timoti

²kwavakwilimyanga na kwavakukulupilika vanung'unumunu nkati mumwe Klistu vápagwa ku Koloshu. Umonyo upagwe kwenu mwenu na amani vyakwalakela kumwe Nnungu Tatagwetu.[1]

³Ngwengwe tunkunnambwalela Nnungu Tatamunu umwe UMU wetu Yesu Klistu patunshwalidya mwenu

⁴kutunduvangila patwigwite yalikulupililo lyenu nkati mumwe Klistu Yesu na linagwaledyo lyamuvenavo kwavakwilimyanga uti

⁵kwamwaa walilindilililo lyavankandyadidye kuwa, lilindilililo lyolyo lyamwigwite kunantandi kwaindila yalilove lyaumwiu, wo ntenga wambone

⁶umwikidíle mwenu wo. Ntenga au, undauka mushu upa vyepo shilambo uti na unkukulumuka kenga mo mwaivalalele kwenu mwenu kutunduvangila muliduva lyamwigwite na kumanya umonyo wake Nnungu muumwiu

⁷kenga mwamulipundishididye kumwe Epapalashi ntumwamwetu wakunagwaleka. Nae ni ntumika wakukulupilika umwe Klistu kwaupande wenu

⁸na ni jojo átuvalangidile linagwaledyo lyenu nkati mu Imumu.

⁹Napavedoni, kutunduvangila muliduva lyatwigwite hatunaleka shinu kushwali yenu mwenu tunjugwa Nnungu pakulota dashi, muumbaligwe na limanyilo lyalilotelo lyake nkati mulimanyilo na umanyimanyi uti waimumu

¹⁰kwambangidya muname shinamidyo shimmaikíla UMU, vinnagwela muuti, mupa vyepo mushimadengo uti shambone, mukulumuka mukummanya Nnungu,

¹¹munanawangika na dimongo uti kwodananavo dimongo dyalishangelo lyake kwakulipililila na kwaupole uti,

¹²munnambwalela na lipuwilo Tatamunu átadidye mupagwe mukumajananga maleko avakwilimyanga mulilangadyo.

¹³Nae ni átuposhidye muutawala wamushii kutuukanavo muutawala wamwanagwe wakunagwaleka,

¹⁴mwake nae tunkuvanavo kwambolegwa kùvele kulivalivigwa kwashimadambi.

¹⁵Nae ni ing'ope ya Nnungu ákaaneka,[2] ntandi kuvalekwa waviumbi uti

¹⁶mwaa nkati mwake mundyuka ndakandyangigwa vinu uti, vinu vivéle kuwa na vinu vivéle pai, vinu vyanéka na vinu víkaaneka, viteng'u kwali vyeo, vakutawala kwali vamadalaka, vinu uti vindikandyangigwa kwaindila yake nae na kwamwaa wake nae.

¹⁷Nae ni nantandi wavinu uti na nkati mwake, vinu uti vinkuungananga.

¹⁸Nae ni muti wamili alilá liganisha, shitunduvangilo na ntandi kuvalekwa pakati pavakupela pakulota muvinu uti akamulile lyutu litandi

¹⁹mwaa Nnungu ininnagwela kuumbaligwa kwake uti kuname nkati mwake nae

²⁰na kwaindila yake aunganiange kavili vinu uti kwake atandedya amani kwaindila yamyadi vyake vijaíke panshalaba, vinu uti ata ikava vivéle mushilambo shapai ata ikava vivéle kuwa.

²¹Kushi mwenu mwe mwapukanénge na mwe muvéle mmamongo mumakumbukililo enu kwamwaa wavitendo vyaukalau,

²²ambi apa nae andimuunganianga kavili mumili wake washimunumunu kwaindila yakupela kwake kwambangidya nae akannodye mwenu mùvele mmakwilimyanga, múkave makosha na kwabila kupagwa shakunkanidyanga pamevo pake Nnungu

²³ikava kenga mundauka mushu mulikulupililo munanopa na mulinatela bila kwambukanga lilindilililo lyantenga wambone wamwigwite uvalangangilíke muviumbi uti vivéle pai. Au ni ntenga wowo uukíle nangutadya nangu Paulu ngùve ntumika.

²⁴Napanelo ninkupuwangila mumauvilo angu kwamwaa wenu mwenu mwaa nkati mumili mwangu, ninkuumbadya mauvilo aovíte amwe Klistu kwamili wake lìvele lyo liganisha.

²⁵Lyanavo nditadya kuva ntumika kwodananavo unashilangola wake Nnungu wangupele kwamwaa wenu pakulota kuwisha popo lilove lyake Nnungu,

²⁶shipii ashilá shavapiidye tangu kala dimbula kwadimbula kanji ambi apa shitadídye shimanyike kwavakwilimyanga.

²⁷Kwavanavo, Nnungu andyamuwa avatadye vamanye ukumene shani wamali alishangelo lyashipii ashi pakati pavamidi; shipii asho ni Klistu nkati mwenu, lilindilililo lyalishangelo.

²⁸Ni jojo watummalanganga, tuduma na tumpundisha kula munu nkati mulimanyilo uti pakulota tunnodye kula munu washalowa-uti[3] nkati mumwe Klistu.

²⁹Kwashabaa ai, ninkukola shimadengo shakupwateka ngulikanyalidya kwodananavo shimadengo shake shikóla namene madengo nkati mwangu na dimongo.