Read Ibibiliya mu Shimakonde Imbodi Yaambi na dimbande dya Imbodi Yakala Vakoloshu 2 Bible Online

Vakoloshu 2 - Ibibiliya mu Shimakonde Imbodi Yaambi na dimbande dya Imbodi Yakala bible

Vakoloshu 2

¹Mwaa ninkulota mumanye ukumene shani wakulikanyalidya kwanguvenavo kwenu mwenu na kwa avalá vavéle ku Laudisheya pamo namu uti avalá vakanava kungwona ing'ope yangu

²pakulota doni, mitima vyave vinanawangike vàungene mulinagwaledyo kwambangidya vapate mali uti auwakika uti aalakéla mulimanyilo kwambangidya dashi, vamanye shipii shimwe Nnungu, jo Klistu aju.

³Nkati mwake nae mundilikondya vidimbi uti vyalimanyilo na umanyimanyi.

⁴Avi ninkumwaulila pakulota hanapagwe munu wakunduwanga na malove akuutila

⁵mwaa ata ikava kenga hangupali ako kwamili kanji kwaimumu ninkupagwa namu mwenu[4] ngupuwanga kwakulipanga kwenu na kunanopa kwalikulupililo lyenu kumwe Klistu.

⁶Napavedoni pakuva mwenu munimpwashalela Klistu Yesu kenga UMU, nama nkati mwake

⁷muvanavo dinyija na mùdangegwe nkati mwake, munanawangika mulikulupililo kenga mo mwavampundishididye na mùumbaligwidye kulambwalela.

⁸Lilaledye, hanapagwe munu wakuntwala mateka atumila mang'amung'amu na kushang'apa kwamambinya kwodananavo mavalelo ashimunumunu na dimumu ditawála shilambo ashi kanji i kwodananavo Klistu.

⁹Mwaa nkati mwake nae, kuumbaligwa uti kwaunnungu kunkunama mumili.

¹⁰Namwenu momo mundyumbaligwa nkati mwake aijá muti wautawala na madalaka uti.

¹¹Namomo nkati mwake, mwenu mundikumuligwa likumbi i likumbi lyavakumula vanu kanji lyakulyusha mili washimunumunu, lyo lyakumula Klistu

¹²pamuukile ndashikigwa namu nae muubatisho, wo wamuukile ndadyuka namu nae kwaindila yalikulupililo mushimadengo shadimongo shake Nnungu ándyuwidye pakati pavakupela.

¹³Namwenu pamupadíle nkati mukupujungula kwenu na kwabila kukumuligwa likumbi mili vyenu vyo, Nnungu ampelé shingumi pamo namu nae àtulivalidile kupujungula kwetu

¹⁴na àputenge mashauma uti amadeni etu e apagwíte kwetu wetu. Mashauma ala, nae andimalidya akamalela panshalaba,

¹⁵avapoka dimongo vakutawala na vamadalaka. Nadoni nae avatadyengé dyoni paumbala avatema kwaindila yanshalaba.

¹⁶Napavedoni hamunanneka munu woewoe amuukumu kwamwaa waing'ano yavyakulya na vyakukumbila kwali kwamaduva avikukulu vyadidini kwali kwakupuwangila kwakwaneka mwedi waambi kwali kwamwaa waliduva lyakupumula.

¹⁷Vinu avi ni shimbedi sha avilá vilóta kwida kanji umwiu ni Klistu.[5]

¹⁸Hamunanneke munu ampoka lidaka lyenu kwakupuwangila namene mukulishapeya na mukulipudya kwavanjelo, atadolyatadolya avilá vyagwene na alitumbudyatumbudya mumakumbukililo ake ashimunumunu.

¹⁹Munu kenga aju hanalinamatila shinu mmuti, muti wowo utádya mili uti paupwashalalegwa na paungananga mumalundu na mumipa, ukulumuke kwalikulumukililo lya Nnungu.

²⁰Ikava kenga mwenu mundipela namu Klistu kwadimumu ditawála shilambo ashi, mwaa shani napane kenga mo mwamushinamila mushilambo ashi munkulivika mwina lilamulo?

²¹“Hamunakamule ashi! Hamunalinge ashilá! Hamunakumbe asho!”

²²Avi uti vankwamba avilá vitumíka kutwala kutimbikanga. Malamulo alo ankwodananavo mang'amung'amu na mapundisho ashimunumunu tu bai.

²³Mwiu ankwaneka kuvanavo limanyilo nkati mukulipudya kwavapanganianga vanu, nkati mukulishapeya na nkati mukuvyauvyanga mili kanji havive mana akwimidya kunagwaledya kwamalotelo ashimunumunu.