Read Ibibiliya mu Shimakonde Imbodi Yaambi na dimbande dya Imbodi Yakala Vakoloshu 3 Bible Online

Vakoloshu 3 - Ibibiliya mu Shimakonde Imbodi Yaambi na dimbande dya Imbodi Yakala bible

Vakoloshu 3

¹Napavedoni ikava kenga mundidyuka namu Klistu, bai lambela vinu vivéle kuwa kwaikele Klistu kunkanakono kwake Nnungu.

²Kumbukila vinu vivéle kuwa i vivéle mushilambo shapai

³mwaa mwenu mundipela kutwala shingumi shenu kukandyegwa namu Klistu nkati mumwe Nnungu.

⁴Napane palota kwaneka Klistu ávele shingumi shenu, namwenu momo mundaaneka namu nae mulishangelo.

⁵Nadoni nkati mwenu, pedya uti avilá vyashimunumunu; kulavalava, ushapu, ditamaa, malotelo aukalau na ing'ou, ako ni kulipudya kwavyakushang'apa.

⁶Kwamwaa wavinu avi shinkwida shitundi shake Nnungu [kwa avalá vákaigwilila].[6]

⁷Muvinu avi namwenu momo kala mushindatenda yadavo pamushinama muvyanavo

⁸kanji ambi apa, nyemya vinu avi uti: shitundi, shishimwashimwa, vitendo vyaukalau, kwabola na kumya malove adyoni nkanywa mwenu.

⁹Hamunashang'apanile mwaa mwenu mundimula munu wakala pamo na vitendo vyake

¹⁰kutwala kungwala munu waambi ádyuwangidya kavili nkati mulimanyilo kwodananavo ing'ope yake aijá ámuumbile.

¹¹Apa hapali ngalegu kwali muyuda, wakukumuligwa likumbi kwali ákakumuligwe, mmidi kwali mushikita, ntumwa kwali wamuunaiti kanji Klistu ni uti na nkati muuti.

¹²Napavedoni kenga mmenentete mmakutandalegwa vake Nnungu, mmakwilimyanga na mmakunagwaleka, gwala shididi shamuntima, kutanana, kulishapeya, upole na kulipililila.

¹³Pililanila na ikava kenga jumo ankuvanavo shakukashali kwamunu junji, napane pakuva UMU aninnivaliva mwenu namwenu momo livalilanila.

¹⁴Pashanya pavinu avi uti, gwala linagwaledyo, lyanavo ni lyunganilo liu.

¹⁵Doni, amani imwe Klistu ave nkwángangola mmitima myenu mwaa kwaamani mwenu mundishamegwa kwamili umo na muve mmakulambwalela.

¹⁶Lilove limwe Klistu liname namene nkati mwenu, mupundishania na mudumana kwalimanyilo uti, mwimba dimu,[7] dimu dyalutumbyango na vilanga vyaimumu, muvanavo lilambwalalelo mmitima vyenu kwa Nnungu.

¹⁷Uti vyamulota kutenda, ata ikava kwalilove kwali kwavitendo, tenda palina limwe UMU Yesu munnambwalela Nnungu Atata kwaindila yake.

¹⁸Mmadyamunu, livike mwina mwavatavenu kenga mo mwaivalalele kumwe UMU.

¹⁹Mmatwamunu, vanagwaledye vadyavenu na hamunavavikile ukalau.

²⁰Mmana, vaigwilile vatatavenu muvinu uti mwaa amu ni munnagwela UMU.

²¹Mmatatamunu, hamunavaikalile vanavenu kwambangidya hadinavapunguke dimongo.

²²Mmatumwa, nkati muvinu uti vaigwilile vanang'olo venu vamushilambo shapai, i mwaneke pakulota ivanagwele vanu kanji na ntima shii munjopa UMU.

²³Uti vyamutenda, tenda na ntima uti kenga muntandela UMU i vanu

²⁴mumanya doni, mundapata alalá maleko kumwe UMU kenga dinudyo dyenu. Ni UMU Klistu wamuntumika;

²⁵aijá átenda vyakunyata, andalipigwa ko kunyata mwaa hakupali kupambula.