Read Ibibiliya mu Shimakonde Imbodi Yaambi na dimbande dya Imbodi Yakala Vakoloshu 4 Bible Online

Vakoloshu 4 - Ibibiliya mu Shimakonde Imbodi Yaambi na dimbande dya Imbodi Yakala bible

Vakoloshu 4

¹Mmanang'olo, vaangangalange vatumwa venu kwaishaliya na aki mumanya doni, namwenu momo munkuvanavo nang'olo jumo kuwa.

²Wena mushu munanopa mukushwali, muva mevo nkati mwake na mulambwalela,

³mutushwalidya wetu momo pakulota Nnungu atuungulile nnango kwalilove tuvalangange shipii shimwe Klistu ashilá shitadídye nangu nguungwe.

⁴Shwali kwambangidya nangu ngutandedye shipii shake shimanyike ngala kenga muvaikidíle ngutende.

⁵Nama kwalimanyilo kwavanu vapanda, mutumila shana litala lyenu.

⁶Malove enu ngwengwe ave aumonyo mùtakidile munyu wakumanyila mwashi mwakunjang'ulila kula munu.

⁷Tikiku nung'unumunu wakunagwaleka na ntumika wakukulupilika, ntumwamwangu mushimadengo shimwe UMU nae anammanyiya dyabali dyangu uti.

⁸Kwamwaa wowo au ninkuntumidya kwenu mwenu pakulota mumanye uti vipíta kwetu wetu na kwambangidya ananawange mitima vyenu.

⁹Namu nae ninkuntumidya Oneshimu nung'unumunu wakunagwaleka na wakukulupilika jo mwenentete mwenu. Vanavo vanammanyiya dyabali dyavinu uti vitandéka akuno.

¹⁰Alishitaliku nkúngwamwangu nae ankuntumidya mwenu nandele; namomo Malukushi binamu wake Balinaba. Ing'ano imwe Malukushi, mwenu mundipata malailililo; paida po, mpwashalele.

¹¹Yesu aijá wavanshema Yustu yadavo ankuntumidya nandele. Ni vayuda vovo ava gweka tu pakati pavamadengomwangu kwautawala wa Nnungu na vanavo vanditadya kuva lipambadyangidyo kwangu nangu.

¹²Epapalashi mwenentete mwenu na ntumika umwe Klistu Yesu, nanae momo ankuntumidya nandele. Nae ngwengwe ankulikanyalidya mukushwali kwaupande wenu mwenu pakulota mwimile mùudile[8] na mùliikinidye mumalotelo uti ake Nnungu.

¹³Kwake nae ninkwing'a ushuda kenga nae ankutenda namene dimongo kwamwaa wenu mwenu na kwa avalá vapágwa ku Laudisheya na ku Ielapolishi.

¹⁴Lukashi talatolo wakunagwaleka ankuntumidya nandele, namomo nanae Demashi.

¹⁵Vape nandele vanung'unumunu va ku Laudisheya, namomo Nimpa na liganisha uti likadyaniánga paing'ande pake.

¹⁶Ling'oto lyakushomya ibalugwa ai pakati penu, tadya yuke ikashamegwe muliganisha lyavalaudisheya, namwenu momo ya ku Laudisheya yo, shomya.

¹⁷Mwaulile Alikipu doni, “Angaikangila utumika waupatile nkati mumwe UMU pakulota ukawishe popo.”

¹⁸Nangu Paulu ninkumwandikila nandele aju na nkono wangu nimwene. Kumbukila mang'unyang'unya angu. Umonyo upagwe kwenu mwenu.