Read Ibibiliya mu Shimakonde Imbodi Yaambi na dimbande dya Imbodi Yakala I Vateshalonika 4 Bible Online

I Vateshalonika 4 - Ibibiliya mu Shimakonde Imbodi Yaambi na dimbande dya Imbodi Yakala bible

I Vateshalonika 4

¹Kumwisho akuno mmanung'unumunu tunkunjugwa na kunnaililila palina limwe UMU Yesu doni, kulingana kenga mo mwamupwashaladile kwetu wetu amulá muvaikidíle muname na munnagwele Nnungu kenga mwiu mwamutandela, bai wenanavo mushu mutandedya kupunda apo.

²Mwenu mundimanya malamulo shani atumpele kwaindila yamadalaka amwe UMU Yesu.

³Mwaa malotelo amwe Nnungu ni akujaluwangigwa mwenu mukwilimyanga: doni, mwapukanangenavo vyakulauka,

⁴kula munu amanye kushunga mili wake mukwilimyanga na ishima

⁵i kwakunshanona ntima kwaushapu kenga vamidi vákammanyite Nnungu.

⁶Kwaing'ano ai, hanapagwe wakunkwinyanga kwali wakunshonda nung'unumunu mwaa kwavinu vyovyo avi, UMU ni nkúlipilila kenga mo mwatumwaulidile kaladavo na mwatuumididye ushuda ngala.

⁷Mwenu, Nnungu hatushamile kwaushapu kanji mukwilimyanga.

⁸Napavedoni aijá áita avi, hanamwita munu kanji Nnungu ámupa Imumu wake Wanashwe.

⁹Napanelo kwaing'ano yalinagwaledyo lyashinung'unumunu hainaloteka shinu kumwandikila mwaa mwemwe mmene mundipundishigwa namu Nnungu pakulota munagwaladyanie.

¹⁰Namwiu munkutenda kwavanung'unumunu Makedoniya uti. Tunkunnaililila napane mmanung'unumunu mutandedye kupunda apo,

¹¹muvenavo liu lyakunama kwaamani, mwangangalange vyenu mmene na mukole madengo kwamikono vyenu kenga mo mwatumpundishididye

¹²kwambangidya muname shalowa kwa avalá vapanda na hashinapagwe shakumwova.

¹³Napanelo hatunalota shinu mutikinange mmanung'unumunu kwamwaa wa avalá valéle kwambangidya hamunavenavo shipalodi kenga avalá vanji vákave lilindilililo.

¹⁴Mwaa ikava kenga tunkukulupila kenga Yesu andipela kutwala kudyuka nimumo momo tunkukulupila kenga uti avalá valéle nkati mumwe Yesu, Nnungu andavaidanavo pamo namu nae.

¹⁵Vyatumwaulila avi tunkumwaulila kwalilove limwe UMU kenga wetu túvele mushingumi, túbakila mpaka kwida kwake UMU, mwiu hatuva tuvatandi kuvapunda avalá valéle.

¹⁶Mwaa jo mwene UMU andashuluka kwaloka kuwa na lidi lyadimongo, lidi lyanjelo nang'olo, lidi lyalipalapanda lya Nnungu na avalá vapadíle nkati mumwe Klistu, vandava vatandi kudyuka

¹⁷kutwala wetu túvele mushingumi túbakidile, tundatanduligwa pamo na vanavo mumaundi ndakadyania namu UMU kuniania, nadoni tundapagwa namu UMU ngwengwe.

¹⁸Napavedoni ing'ana ntima shii kwamalove ala.