Read Ibibiliya mu Shimakonde Imbodi Yaambi na dimbande dya Imbodi Yakala I Vateshalonika 5 Bible Online

I Vateshalonika 5 - Ibibiliya mu Shimakonde Imbodi Yaambi na dimbande dya Imbodi Yakala bible

I Vateshalonika 5

¹Napanelo ikava yawakati na yamaiko mmanung'unumunu, mwenu haivaikidile mwandikiligwe shoeshoe

²mwaa mwemwe mmene mundimanya shalowa doni liduva limwe UMU lindaida kenga mwaidila nkwíva shilo.

³Pavaashidoni, “Ipali amani na lishililidyo,” bai apo ni palota kuvaidila kubamola shingangala kenga kupwateka kwaluvaleko kumwidila nkongwe washitumbo; kwavanavo hamupali mwakukwapela.

⁴Kanji napane mwenu mmanung'unumunu hamunapagwa shinu mushii kwambangidya liduva alyo halinampatikaniange kenga nkwíva

⁵mwaa uti mwenu ni mmana mmalilangadyo na mmamui. Hatunava shinu vashilo na ata vamushii.

⁶Napavedoni hatunalale kenga vanji kanji tuve mevo na tuvakulipanga

⁷mwaa valála vo, valala shilo na vaambálwa vo, vaambalwa shilo.

⁸Wetu kanji túvele vamui tulipange tùgwete shikopa shalikulupililo na linagwaledyo na kenga shijulu shashitali, lilindilililo lyakwambolegwa.

⁹Mwaa Nnungu hatupangidile kwashitundi kanji pakulota tupate kwambolegwa kwaindila imwe UMU wetu Yesu Klistu

¹⁰ápadile kwamwaa wetu kwambangidya ata tukava mevo kwali tukalala, tuname namu nae.

¹¹Napavedoni, ing'ana ntima shii na nanawananga kenga mo mwamutandela mo.

¹²Napanelo mmanung'unumunu ninkunjugwa muvaishimu avalá vakóla madengo pakati penu, vo vannangalaléla nkati mumwe UMU na vandúma.

¹³Vape ishima ing'umene nkati mulinagwaledyo kwamwaa washimadengo shave. Avanavo amani pakati penu.

¹⁴Momo tunkunnaililila mmanung'unumunu, avalá vawondo vadume, vivadidíma mitima vapambadyange, vakudabadabanga vapwashele na ava mmapole kwavanu uti.

¹⁵Lilaledye shana kwenu mwenu hanapagwe woewoe wakunnipa muje wakunyata kanji ngwengwe vingilidya ashilá shambone kwaupande wenu mwemwe mmene kwali kwavanu uti.

¹⁶Puwanga ngwengwe.

¹⁷Shwali kwabila kudoba.

¹⁸Lambwalela muuti mwaa ala ni malotelo ake Nnungu kwenu mwenu nkati mumwe Klistu Yesu.

¹⁹Hamunandime Imumu.

²⁰Hamunailudyange kulava

²¹kanji tenda nningo vinu uti mutwale mukamulile ashilá shambone.

²²Apukananganavo inamuna uti yavyakunyata.

²³Napanelo jo mwene Nnungu waamani anjaluwangidye uti mukwilimyanga na imumu yenu, ungumi wenu na mili vyenu uti vikondyegwe pavikavanavo makosha mukwida kumwe UMU wetu Yesu Klistu.

²⁴Aijá ánshema mwenu ni wakukulupilika; nae uti avi andatandedya.

²⁵Mmanung'unumunu, tushwalidya nawetu momo.

²⁶Vape nandele vanung'unumunu uti kwashimanyikilo shalinagwaledyo.

²⁷Ninkunnaililila nkati mumwe UMU doni, ibalugwa ai ikashameke kwavanung'unumunu uti.

²⁸Umonyo umwe UMU wetu Yesu Klistu upagwe na mwenu.