Read Ibibiliya mu Shimakonde Imbodi Yaambi na dimbande dya Imbodi Yakala II Vateshalonika 1 Bible Online

II Vateshalonika 1 - Ibibiliya mu Shimakonde Imbodi Yaambi na dimbande dya Imbodi Yakala bible

II Vateshalonika 1

¹Paulu, Shilivanu namu Timoti, kwaliganisha lyavateshalonika lìvele nkati mumwe Nnungu Tatagwetu namu UMU Yesu Klistu.

²Umonyo upagwe kwenu mwenu na amani yakwalakela kumwe Nnungu Tatamunu[1] namu UMU Yesu Klistu.

³Indituvaikila tunnambwalele Nnungu ngwengwe mmanung'unumunu kwamwaa wenu pakuva ni shaliya mwaa likulupililo lyenu linkukulumuka namene na linagwaledyo lyakula munu pakati penu kwavanji, linkwanjadyeka

⁴ata mpaka wewe tuvene kulitamangila mwenu mmaganisha a Nnungu kwamwaa wakunanonopa kwenu na likulupililo lyenu mukupapatigwa na mumauvilo uti amulipililila.

⁵Avi uti ni kulodya ngala shaliya yaukumu yake Nnungu kwambangidya mwenu muvalangiligwe kuva mmakuvaikila muutawala wa Nnungu, wo wamuvauvangila wo,

⁶pakuva namwiu Nnungu ankuvalangilila ishaliya kuvalipa tabu avalá vamwikalíla

⁷kutwala kumupa mwenu múuvauvanga kupumula pamo namu wetu. Ashi shindatandeka paaneka UMU Yesu aumilila kuwa pamo na vanjelo vake vadimongo

⁸mulilamba lyamoto avapa shaushanga avalá vákammanya Nnungu na vákaigwilila ntenga wambone umwe UMU wetu Yesu.

⁹Vanavo vandauvauvanga ukumu yakubamalegwa kúkamalilika, kuvaapukanianga pamevo pamwe UMU na mulishangelo lyadimongo dyake

¹⁰paida muliduva alyo ndapata lishangelo muvakwilimyanga vake na avashangania pakati pa avalá vankulupidíle pamo na mwenu mwaa mundikulupila ushuda wetu.

¹¹Kwaing'ano ai tunkunshwalidya mwenu ngwengwe kwambangidya Nnungu wetu antadye mwenu muve mmakuvaikila mukushema kwake na muwishe popo kwadimongo dyake malotelo uti auwambone na kula shimadengo shalikulupililo

¹²kwambangidya dashi, lina limwe UMU wetu Yesu lipate lishangelo nkati mwenu na mwenu nkati mwake kwakwodananavo umonyo wa Nnungu wetu na umwe UMU Yesu Klistu.