Read Ibibiliya mu Shimakonde Imbodi Yaambi na dimbande dya Imbodi Yakala II Vateshalonika 2 Bible Online

II Vateshalonika 2 - Ibibiliya mu Shimakonde Imbodi Yaambi na dimbande dya Imbodi Yakala bible

II Vateshalonika 2

¹Kwaing'ano napane yakwida kumwe UMU wetu Yesu Klistu na yakukumbuligwa kwetu kwake, tunkunjugwa mmanung'unumunu

²doni, hamunaangaishangigwe shipajelo muding'anong'ano dyenu na hamunaangaikange ata kwaimumu kwali kwalilove kwali kwaibalugwa yaanéka kuva kenga yaloka kwetu iishidoni, liduva limwe UMU, tayali lindiwika.

³Hamunanneke munu anduwanga kwainamuna yoeyoe mwaa liduva alyo, haliwika shitandi kukanava kupagwa kumpinga Nnungu na ankwaneka munu waungave-lilamulo[2] aijá mwana wakubamalegwa,

⁴jo ápinga na álikwedya pashanya pavinu uti avilá vishamégwa kuva Nnungu kwali vinu vyakulipudidya kutadya mpaka kwikala mwing'ande ya Nnungu alivalanganga kuva Nnungu.

⁵Da hamunakumbukila shinu kenga vinu avi nimmalangangila ngùvele namu mwenu?

⁶Nadoni ashilá shindingadínga nae ambi apa, mwenu mundimanya kwambangidya aaneke muwakati wene-wene.

⁷Mwaa shipii shaungave-lilamulo tayali shinkukola madengo ila apali ándingadinga ambi apa mpaka nae vamushe.

⁸Bai apo andaaneka waungave-lilamulo aijá walota kuntimbanga UMU Yesu kwaimepo yankanywa mwake na kummalidya kwakuumilila kwakwida kwake.

⁹Kwida kumwe waungave-lilamulo kulota kwodananavo shimadengo shimwe Shatwani kwadimongo uti, vimanyikilo na vyakutikinikanga vyaushwang'a

¹⁰na kwakuduwanga uti kwaungave-shaliya kwa avalá vavéle mukujaika. Vanavo vankujaika pakuva vandita kunagwaledya umwiu kukavatadidye vaambolegwe.

¹¹Ni ashi shitádya Nnungu avapalakadyedye dimongo dyakuvadumbyadumbya pakulota vakulupile ushwang'a

¹²kwambangidya vaukumigwe uti avalá vákakulupila umwiu kanji vapuwangila ungave-shaliya.

¹³Wetu napane indituvaikila ngwengwe tunnambwalele Nnungu kwamwaa wenu mmanung'unumunu mmakunagwaleka vamwe UMU mwaa Nnungu anintandola mwenu kenga vyepo vitandi vyakwambolegwa[3] kwaindila yakujaluwangigwa mukwilimyanga kwa Imumu na kwakukulupila umwiu.

¹⁴Kwakwambolegwa aku nae aninshema mwenu kwaindila yantenga wambone wetu kwambangidya mupate lishangelo limwe UMU wetu Yesu Klistu.

¹⁵Napavedoni mmanung'unumunu, nanopa na kamulila ashilá shamupundishigwidye kwali kwalilove kwali kwaibalugwa yetu.

¹⁶Doni, jo mwene UMU Yesu Klistu namu Nnungu Tatagwetu átunagwaladidye na átupele kupambadyangigwa kúkamalilika na lilindilililo lyambone kwaumonyo,

¹⁷apambadyange mitima vyenu na annonowange mushimadengo uti na mulilove uti lyambone.