Read Ibibiliya mu Shimakonde Imbodi Yaambi na dimbande dya Imbodi Yakala II Vateshalonika 3 Bible Online

II Vateshalonika 3 - Ibibiliya mu Shimakonde Imbodi Yaambi na dimbande dya Imbodi Yakala bible

II Vateshalonika 3

¹Kumwisho akuno mmanung'unumunu, tushwalidya wetu pakulota lilove limwe UMU lyandavale shipajelo na lipate ishima kenga mwaitandakadile pakati penu

²na kwambangidya tuposhegwe kwavanu vakalau na vakunyata mitima. Mwaa i uti vavénavo likulupililo.

³Kanji napane UMU ni wakukulupilika, nae anannonowanga na ananshunga kumwe aijá nkalau.

⁴Tunkuvanavo likulupililo nkati mumwe UMU ikava yenu mwenu, vinu vyatunnamulidile munkutenda na mundauka mushu mutenda.

⁵Napane UMU alangalele mitima vyenu vinanapele kulinagwaledyo lya Nnungu na kukulipililila kumwe Klistu.[4]

⁶Napanelo tunkunnamulila mmanung'unumunu palina limwe UMU wetu Yesu Klistu doni, vaambukange vanung'unumunu vanáma shinamidyo shauwondo i kulingana na mavalelo avapatile kwalakela kwetu.

⁷Mwenu mmene mundimanya mwashi muvaikidíle mutujadyedye mwaa patupagwíte namu mwenu, hatuvéle tuvawondo

⁸na ata hatulile bule shakulya shamunu woewoe kanji tùpagwite mushimadengo shakupwateka na mumauvilo, tundikola madengo shilo na mui pakulota hatunave ligogo kwamunu woewoe pakati penu.

⁹I do, hatuvenavo aki ayo kanji pakulota tulyumye wewe tuvene kenga mpano wakujedya mwenu.

¹⁰Mwaa ata patupagwíte namu mwenu tunínnamulila doni, munu akanalota kukola madengo, bai hanalye.

¹¹Mwenu, tundigwa kenga vanji pakati penu vankunama shinamidyo shauwondo; havanakola shinu madengo ila vankulijalanianga muvinu vyavanu vene.

¹²Vanu vantindo au tunkuvalamulila na kuvalaililila nkati mumwe UMU Yesu Klistu doni, vakole madengo kwaamani kwambangidya valye shakulya shavo vo vene.

¹³Kwaupande wenu mwenu mmanung'unumunu hamunadobe kutandedya wambone.

¹⁴Ikava kenga munu hanaigwilila shinu shatutangwele mwibalugwa ai, munu ajo mmanye, hamunalyunganiange namu nae kwambangidya ataigwe dyoni

¹⁵kanji hamunammalangilile kuva mmongo ila ndume kenga nung'unumunu.

¹⁶Napanelo jo mwene UMU waamani amupe amani muwakati uti na mudinamuna uti. UMU apagwe pamo namu mwenu uti.

¹⁷Nangu Paulu ninkumwandikila nandele aju kwankono wangu nimwene. Ashi ni shimanyikilo shiu shamudibalugwa dyangu uti; amu ni mwangwandikila.

¹⁸Umonyo umwe UMU wetu Yesu Klistu upagwe namu mwenu uti.