Read Ibibiliya mu Shimakonde Imbodi Yaambi na dimbande dya Imbodi Yakala I Timoti 2 Bible Online

I Timoti 2 - Ibibiliya mu Shimakonde Imbodi Yaambi na dimbande dya Imbodi Yakala bible

I Timoti 2

¹Napavedoni shitandi ninkulaililila kupagwe kujugwa, kushwali, kujugwangila na kulambwalela kwaupande wavanu uti,

²kwavaumu na kwauti avalá vavénavo madalaka pakulota tuname shinamidyo shaamani na shakutulila nkati mukunjopa Nnungu na ishima uti.

³Ashi ni shinu shambone na shakunagwaleka pamevo pake Nnungu Mwamboli wetu

⁴jo álota vanu uti vaambolegwe na vakawikile mulimanyilo lyakumanya umwiu.

⁵Mwaa ankupagwa Nnungu jumo na kupagwa nkúdumangila jumo pakati pamwe Nnungu na vanu: munu jo Klistu Yesu

⁶ályumidye jo mwene kuva lyambolelo kwaupande wavanu uti. Au ni ushuda uukíle ndatandeka muwakati wake.

⁷Kwamwaa au ndyuka ndapangigwa nguve nkúvalanganga-lilove na myombe, ngutangola mwiu hangunashang'apa shinu, mwalimu wavamidi nkati mulikulupililo na muumwiu.

⁸Napavedoni ninkulota kula lyutu valume uti vashwalye vànyanywile mikono vyakwilimyanga bila shitundi na bila kutaukananga.

⁹Nimumo momo vakongwe valinemye kwadinguvo dyaishima, kwakutulila na kwakulilaledya i kwakuluka ugwimbu na ata kwashaabu kwali majanga amali kwali dinguvo dyabei

¹⁰kanji kwa ashilá shivaikidíle kwavakongwe valivalangánga ishima kumwe Nnungu, matendo ambone.

¹¹Nkongwe inimmaikila alipundishe mukulimaladya alivika mwina muuti.

¹²Hangunaleka shinu do, nkongwe apundishe na ata kuvanavo madalaka kwannume kanji alimaladye.

¹³Mwaa shitandi vankandyengé Adamu kutwala kwatika Eva.

¹⁴Namomo Adamu haukile ndaduwangiligwa ila nkongwe paduwangiligwe andigwa mulidambi.

¹⁵Nkongwe jo napane andaambwalegwa avavaleka vana ikava kenga nae andauka mushu mulikulupililo,[1] mulinagwaledyo, mukwilimyanga pamo na kutulila.