Read Ibibiliya mu Shimakonde Imbodi Yaambi na dimbande dya Imbodi Yakala I Timoti 4 Bible Online

I Timoti 4 - Ibibiliya mu Shimakonde Imbodi Yaambi na dimbande dya Imbodi Yakala bible

I Timoti 4

¹Imumu napane ankutangola ngala doni, muwakati wamwisho vanji vandaambukanga likulupililo kwigwilila dimumu dyakuduwanga na mapundisho avandamoni,

²kwamalambi avakushang'apa vavénavo makumbukililo amuntima aanyóka.

³Vanavo vankuleya kulomba na kukanyalidya kuleka vyakulya vyakandyenge Nnungu vipwashalalegwe kwalilambwalalelo kwavakukulupila na kwa avalá vamanyíte umwiu.

⁴Mwaa kula shinu shakandyenge Nnungu shàmbone na hashipali shivaikidíle shiitigwe shikava kenga shindapwashalalegwa kwalilambwalalelo

⁵pakuva shanavo sho, shitandegwa kwilimyanga kwaindila yalilove lya Nnungu na kushwali.

⁶Ukavaulila vinu avi vanung'unumunu, undava ntumika wambone umwe Klistu Yesu ulidyavalakedya kwamalove alikulupililo na amapundisho ambone awodedya.

⁷Kanji napane ita dinano díkave ishima na dyashinyakala ila lidyavalakedye shinamidyo shakunjopa Nnungu.

⁸Mwaa kulidyavalakedya kwamili kunkuvanavo paida yake ila kunjopa Nnungu kunkuvanavo paida muuti kuvanavo kulivikila kwashingumi ashi na shída.

⁹Lilove ali ni lyakukulupilika na lindivaikila likubaligwe uti.

¹⁰Ni ashi shitádya wetu tukole madengo akupwateka na tulikanyalidye pakuva tundivika lilindilililo lyetu kwa Nnungu mumi ávele Mwamboli wavanu uti kupunda namene kwavakukulupila.

¹¹Lamulila vinu avi na pundisha.

¹²Hanapagwe wakukwiludyanga kwamwaa wakuva wako unnemba kanji ava mpano kwavakukulupila mukutangola, mushinamidyo, mulinagwaledyo, mulikulupililo na muungave-ushapu.

¹³Mpaka pangulota kwida, angaikangila kushomya Maandiko paumbala, kulaililila na kupundisha.

¹⁴Haunaleke kunyenje shajo shavakupele wako kwaindila yakulava pavakuvikidile makono pankodyanio wavanang'olo.

¹⁵Tandedya vinu avi, pagwa nkati mwake pakulota likulumukililo lyako lyaneke kwavanu uti.

¹⁶Lilaledye namene gwegwe umwene na mapundisho ako. Nanopa mwanavo mwaa pautenda davo po, undaliposha wako umwene pamo na avalá vakwigwilíla.