Read Ibibiliya mu Shimakonde Imbodi Yaambi na dimbande dya Imbodi Yakala I Timoti 5 Bible Online

I Timoti 5 - Ibibiliya mu Shimakonde Imbodi Yaambi na dimbande dya Imbodi Yakala bible

I Timoti 5

¹Haunanshulange munu ákupundile shilinga kanji nnaililile kenga tatamunu, vanemba kenga vanung'unumunu,

²vakongwe vaulinga kenga vajujumunu na vali kenga valumbumunu nkati muungave-ushapu uti.

³Vaishimu vanamwili avalá vanamwili mwiu mwiu vákave pashinu.

⁴Kanji ikava kenga namwili ankuvanavo vana kwali udukulu, vanavo shitandi valipundishe kulodya kunjopa Nnungu kwavapaing'ande pave vo vene vavaujidya inudyo kwavatatamunu, amu ni munnagwéla Nnungu.

⁵Napane namwili wiu ákave pashinu aijá ávele bai gweka yake, ankuvanavo lilindilililo lyake kumwe Nnungu na ankuka mushu mukujugwangila na mukushwali shilo na mui.

⁶Kanji namwili áliinjidyenge mushinamidyo shamalotelo ake, ata ikava kenga nae po ankunama, andipela.

⁷Lamulila vinu avi kwambangidya havanavenavo makosha.

⁸Ikava kenga munu hanavashunga shinu vakwave na kupunda namene avalá vapaing'ande pake, ajo andita likulupililo na ni ámamodya namene kumpunda aijá ákakulupila.

⁹Hanaandikigwe namwili mulishauma lyavanamwili pakavenavo vyaka sitini vyaulinga, nkongwe wannume jumo[3]

¹⁰na ámanyike shana kwashimadengo shake shambone: ávaladile vana, ákalibishidye, ánavyenge medi madodo avakwilimyanga,[4] ávapwashaladile vakuvauvanga na álijawile mushimadengo shambone shakula inamuna.

¹¹Vaite vanamwili vali pakuva mweshe wave paulota kuvalivadya kumwe Klistu, vandalota valombwe kavili

¹²kutwala kuukumigwa kwamwaa wakwambukanga likulupililo lyave litandi.

¹³Leka apo, vandálipundisha vave vawondo vawanawananga nding'ande na i gweka vawondo kanji namomo vakung'wenya, vakuliinjidyanga mumyaa vatangola vinu víkavaikidile.

¹⁴Nadoni nangu ninkulota doni, vanamwili vali valombwe, vavenavo vanavave, vapange shana ding'ande dyave pakulota havanamupe litala mmongo lyakututangola kunyata.

¹⁵Namwiu, vanji vo vandyashalanga kumwoda Shatwani.

¹⁶Ikava kenga nkongwe nkúkulupila andivanavo vanamwili palikola lyake, inimmaikila avapwashele pakulota liganisha halinaidapelwe kwambangidya dashi lyanavo livashunge avalá vanamwili mwiu vákave pashinu.

¹⁷Avalá vanang'olo valangalaléla shana, vandivaikila vapate ishima ing'umene kupunda namene avalá vakóla madengo akuvalanganga lilove na kupundisha

¹⁸mwaa Maandiko ankushidoni, “Haunamunge ng'ombe pampulula ngano,”[5] na, “Mmádengo inimmaikila apate nshala wake.”[6]

¹⁹Haunaitikile vyakutambudyanga vimwámba nang'olo paukapagwa ushuda wavanu vavili kwali vatatu.

²⁰Avalá vatéga vashulange paumbala kwambangidya vanji vo, vajope.

²¹Ninkumya ushuda pamevo pamwe Nnungu, pamwe Klistu Yesu na pavanjelo vakutandalegwa doni, vinu avi vikila kuntima bila kupambula paukatandedya shoeshoe kwashitete.

²²Haunapupange kummikila munu makono na ata haunaliinjidyange mushimadambi shavanu vanji; nanopa muungave-ushapu.

²³Napane wako haunauke mushu ukumbila gweka yake medi kanji kumbila padyoko vinyu kwamwaa wammunda pamo na malwele akukódya kula wakati.

²⁴Madambi avanu vanji ankwaneka ngala alangalalela muukumu kanji avanu vanji aatika kunyuma.

²⁵Nimumo momo shimadengo shambone shinkwaneka ngala na ata ashilá shilipiídye, hashuulula kupiika.