Read Ibibiliya mu Shimakonde Imbodi Yaambi na dimbande dya Imbodi Yakala I Timoti 6 Bible Online

I Timoti 6 - Ibibiliya mu Shimakonde Imbodi Yaambi na dimbande dya Imbodi Yakala bible

I Timoti 6

¹Uti avalá vavénavo likangoti kenga vatumwa, indivavaikila vavatanane vanang'olo vave kenga muvavaikidíle kwaishima uti kwambangidya lina limwe Nnungu na lo mapundisho lo, halanaliuligwe.

²Avalá vavénavo vanang'olo vakukulupila, havanavailudyange kwodamwaa vàkukulupila kanji vavatumike namene kupunda apo mwaa vapáta paida yashimadengo shave shambone ni vakukulupila na vakunagwaleka. Vinu avi pundisha na laililila.

³Munu woewoe akapundisha mapundisho akuvilingananga na ákaitikananga na malove mangumi amwe UMU wetu Yesu Klistu na ata mapundisho aodánanavo kunjopa Nnungu,

⁴munu ajo ni wakulyona na hashipali shamanya. Nae po ni munu ávenavo mweshe wamitau na ing'ondo yamalove iidanavo ing'ou, ushaka, kwabola, kwambambidyania kunyata

⁵na mitau víkave mwisho vyavanu vading'ano dyakutimbikanga vákave umwiu vona kenga kupata malupulupu ni kunjopa Nnungu.

⁶Mwiu, ankupagwa malupulupu nkati mukunjopa Nnungu kukapagwa kutudya ntima kwa ashilá shauvenavo

⁷mwaa hashipali shatwidinavo mushilambo na ata shakuulula kuukanavo.

⁸Napanelo ikava kenga tunkuvanavo shakulilisha kwali shakuliinikidya, bai kwavinu avyo tundatudya ntima.

⁹Kanji napane avalá vavanavo malotelo muntima vave matajili, vanágwa mukutubigwa, mudinambo na mumalotelo oe ákave mana na akunyata alalá avatitimídya vanu mukubamalegwa na mukujaika.

¹⁰Mwaa kunnagwaledya njuluku ni lushija lwavyakunyata uti. Kwakuvikila liu njuluku, vanji vandyashalanga mulikulupililo na kulitalalanga kwavipalodi vyoe.

¹¹Kanji napane wako umunu wa Nnungu linyemye muvinu avyo. Vingilidya napane ishaliya, kunjopa Nnungu, likulupililo, linagwaledyo, lipililililo na upole.

¹²Tenda ing'ondo yambone yalikulupililo. Kamulila shingumi shíkamalilika ashilá shavakushamalele sho shaulyawile pamevo pamashuda oe.

¹³Ninkukulamulila pamevo pa Nnungu jo áing'a shingumi vinu uti na pamevo pamwe Klistu Yesu áumidye ushuda wambone pamevo pamwe Ponji Pilatu,

¹⁴shunga lilamulo ali pakave lilemba na pakave likosha mpaka kuumilila kumwe UMU wetu Yesu Klistu,

¹⁵akulá ko kwalota kulodya Nnungu muwakati wake; Nnungu jo Wakwalaligwa na Nkútawala wagweka, Umu wavaumu na Nang'olo wavanang'olo,

¹⁶jumo ákapela, ánama mulilangadyo lyakavandika munu, aijá ákangwene munu pakati pavanu na ákaululika kwaneka. Kwake nae ipagwe ishima na dimongo díkamalilika. Ame.

¹⁷Kwavatajili vawakati au, valaililile havanalyone, havanavike lilindilililo lyave mumali ákakulupilika kanji vavike lilindilililo lyave kumwe Nnungu átupa uti kwabila kulakalela kwalipuwilo lyetu.

¹⁸Vamanyie vatende wambone, vave matajili mushimadengo shambone, vavenavo ntima wakujaula vava tayali mukujavananga.

¹⁹Vakatenda davo, vandalikungailila mali vo vene kenga shitunduvangilo shambone shawakati ulóta kwida kwambangidya vakamulile ashilá shingumi shiu.

²⁰Wako Timoti, shunga ashilá shaukulupilike. Lyapukaniange na shitangodi shíkave mana na mitau vyavashema kwakushang'apa kuva limanyilo.

²¹Kwakulivalanganga vinu avi, vanji vandyashalanga mulikulupililo. Umonyo upagwe namu mwenu.