Read Ibibiliya mu Shimakonde Imbodi Yaambi na dimbande dya Imbodi Yakala II Timoti 1 Bible Online

II Timoti 1 - Ibibiliya mu Shimakonde Imbodi Yaambi na dimbande dya Imbodi Yakala bible

II Timoti 1

¹Paulu, myombe umwe Klistu Yesu kwalilotelo lyake Nnungu kwakwodanavo kulivikila kwashingumi shipagwíte nkati mumwe Klistu Yesu,

²kumwe Timoti mwanangu wakunagwaleka. Umonyo, shididi na amani vyakwalakela kumwe Nnungu Tatamunu namu Klistu Yesu UMU wetu, vipagwe kwako wako.

³Ninkunnambwalela Nnungu wanintumika kenga mwavantumikidile vanyakala vangu kwamakumbukililo ákave ushapu amuntima pandikukumbukila ngwengwe wako mukushwali kwangu shilo na mui.

⁴Pangukumbukila myodi vyako, ninkuvanavo mweshe woe wakukwona kwambangidya lipuwilo lyangu liwikile popo.

⁵Ninkukumbukila likulupililo lyako liu lyo lye lipagwíte shitandi kwanakuluvo Loide na kwanyoko Eunike na ambi apa ninkuvanavo wakika kenga linkupagwa nkati mwako.

⁶Ni ashi shingutádya nikukumbuwange pakulota ukang'ele shajo shake Nnungu shipagwíte kwako kwaindila yakukuvikila makono angu.

⁷Mwaa Nnungu anditupa Imumu i yakujopa kanji yadimongo, yalinagwaledyo na yakulimaladya.

⁸Napavedoni haunaanangile dyoni kumya ushuda umwe UMU wetu na ata kwamwaa wangu nangu nkúngwa wake kanji uvauvanga namu nangu kwamwaa wantenga wambone kwodananavo dimongo dya Nnungu

⁹aijá átwambwele na átushamile kwalishamelo lyakwilimyanga[1] i kwamwaa washimadengo shetu kanji kwamwaa waishabaa yake jo mwene na umonyo watupatile nkati mumwe Klistu Yesu tangu wakati úkamalilika ukanava kupagwa

¹⁰napane undililodya kwakuumilila kumwe Mwamboli wetu Klistu Yesu. Kwaupande unji nae andimalidya kupela, kwaupande unji mulilangadyo kwidanavo shingumi na ungapela kwaindila yantenga wambone,

¹¹ntenga wowo wangutandalagwidye nangu kuva nkúvalanganga, myombe na mwalimu.

¹²Kwamwaa wavinu avi namomo ninkuvauvanga kanji hangunona dyoni mwaa nimmanya aijá waninkulupidile na ninkuvanavo wakika kenga nae ankuulula kushunga ashilá shangukulupidile[2] mpaka muliduva alyo.

¹³Odedya mpano wamalove mangumi awigwite kwangu upagwa mulikulupililo na linagwaledyo lipágwa nkati mumwe Klistu Yesu.

¹⁴Ashilá shambone shaukile ndakulupilika, shunga kwa Imumu Wanashwe ánama nkati mwetu.

¹⁵Wako undimanya doni uti vamulijimbo lya ku Ashiya vaningwambukanga, pakati pave Pigelu namu Elimogeneshi.

¹⁶UMU alodye shididi shake paing'ande imwe Oneshipolu mwaa myanda vyoe aningutaa dimongo na yakungwa yangu, haanenge dyoni,

¹⁷leka apo pawikile pa Loma aningulambela kwadimongo mpaka kungupata.

¹⁸UMU amupe litala lyakupatila shididi shaalakéla kumwe UMU muliduva alyo! Wako undimanya shana uti mwangutumikidile nae akulá ku Epeshu.