Read Ibibiliya mu Shimakonde Imbodi Yaambi na dimbande dya Imbodi Yakala II Timoti 3 Bible Online

II Timoti 3 - Ibibiliya mu Shimakonde Imbodi Yaambi na dimbande dya Imbodi Yakala bible

II Timoti 3

¹Manya avi napane: mumaduva amwisho undawika wakati wakujowa.

²Mwaa vanu vandava vakulinagwaledya vo vene, vakunagwaledya njuluku, vakulitumbyanga, vakulyona, vakwabola, vákavaigwilila vatatamunu, vákalambwalela, vákanjopa Nnungu,

³vákave linagwaledyo, vákadumika, vakung'wenya, vákalilaledya, vakukalipa, vákalota wambone,

⁴vanánnimya, vakulitauka, vaimbeve, vakunagwaledya vyakudangadanga kuliko kunnagwaledya Nnungu,

⁵vavanavo ding'ope dyakunjopa Nnungu kanji akuno vaita dimongo dyake. Vanu avo, aapukananganavo.

⁶Pakati pavanu ava ni avalá vainjíla nding'ande ndavashomba vakongwe vakudabadabanga vakwidapelwa na shimadambi valangalalégwa na ditamaa dyakula inamuna.

⁷Vakongwe avo vankupagwa ngwengwe valipundisha pavakaulula kuka ndawikila mukumanya umwiu.

⁸Kulingana kenga momo Yaneshi namu Yambaleshi vanímpinga Musha, namomo vanavo vankupinga umwiu; ni vanu vatimbikénge ding'ano dyave, vanu vákave mana kwalikulupililo.

⁹Kanji vanavo havauka shinu mushu mwaa ujinga wave undalilodya ngala kenga mwaivalalele kwavanu vavili avalá.

¹⁰Kanji napane wako undyodedya pepi-pepi mapundisho angu, shiwanedi shangu, nnugu wangu, likulupililo lyangu, kulipililila kwangu, linagwaledyo lyangu, kunanopa kwangu,

¹¹kupapatigwa na mauvilo; vinu vingutandéke ku Antiyokiya, Ikoniu na Kulishitala. Kupapatigwa aku uti, ndilipililila na nkati muvinu avyo uti UMU aninguposha.

¹²Kwakutangola mwiu kula álota kunama shinamidyo shakunjopa Nnungu nkati mumwe Klistu Yesu, andapapatigwa.

¹³Napane vanu vakalau na vakushang'apa vandauka mushu vamamodya kuvaashadyanga vanu na vo vene vaashalangigwa.

¹⁴Wako napane pagwa nkati muumwiu aulá waulipundishidye na wawakikishidye ummanya aijá waulipundishidye

¹⁵na kumanya kenga tangu shidyoko shako undimanya Maandiko akwilimyanga aululíka kukutadya kuva walimanyilo kwakwambolegwa kwaindila yalikulupililo nkati mumwe Klistu Yesu.

¹⁶Maandiko uti andipumuliligwa[4] namu Nnungu na ankupai kupundishidya, kushashulangila, kulingulila na kupundishidya mwishaliya

¹⁷kwambangidya munu wa Nnungu ave wakuulula, wavampanganienge shana kwashimadengo uti shambone.