Read Ibibiliya mu Shimakonde Imbodi Yaambi na dimbande dya Imbodi Yakala II Timoti 4 Bible Online

II Timoti 4 - Ibibiliya mu Shimakonde Imbodi Yaambi na dimbande dya Imbodi Yakala bible

II Timoti 4

¹Ninkumya ushuda pamevo pake Nnungu na pamevo pake Klistu Yesu aijá álota kuvaukumu vangumi na vapadíle, ngulaililila kwakuumilila kwake na utawala wake,

²valanganga lilove lyake Nnungu, ava tayali wakati uvaikidíle na úkavaikidile, shashulanga, shulanga, laililila kwaupole uti na kwakupundisha.

³Mwaa undawika wakati wavakalota kulipililila vanu mapundisho mangumi kanji vavanavo matu akunyang'anyang'a, vandalyumbadidya vamwalimu kwodananavo ditamaa dyave vo vene.

⁴Vandashinjiulila matu ave kunji vaita umwiu na kushinjiukila kudinano.

⁵Kanji napane wako ava umunu wakulilaledya muvinu uti, lipililile mauvilo, kola shimadengo shankúvalanganga ntenga wambone, tandedya utumika wako ukawikile popo.

⁶Kwaupande wangu nangu ninkumiminiligwa vangumya shadaka na wakati wakuma kwangu, undiwika.

⁷Nditenda ing'ondo yambone, ndimalila mashindano, ndishunga likulupililo.

⁸Kutunduvangila apa, vaningukandyedya lidaka lyaishaliya lyalota kungupa UMU, nkúukumu waishaliya muliduva alyo na i gweka nangu kanji namomo uti avalá vanagwalédya kuumilila kwake.

⁹Tenda dimongo wide ungukodye shipajelo.

¹⁰Mwaa Demashi kwakunagwaledya wakati au, aningwambukanga kutwala kuka ku Teshalonika. Keleshete kuka ku Galata, Titu kuka ku Dalamashiya.

¹¹Ni Lukashi gweka yake ápagwite namu nangu. Pawida ntwale Malukushi mwide pamo mwaa nae ni lipwashalelo likumene kwangu kwautumika.

¹²Tikiku nae nintumidya ku Epeshu.

¹³Napane paulota kwida po, ngunyakatila likoti lyaninnakalele Kalupu ku Tolowashi na mabuku, kupunda namene alalá amagwogwe.

¹⁴Alishandale aijá nkwána aningutenda vyakunyata vyoe namene; UMU anannipilila kwakwodananavo avilá vyatandile.

¹⁵Nawako momo lilaledye kwaupande wake mwaa andipinga na dimongo malove etu.

¹⁶Mukulishililidya kwangu kutandi, hapali munu ata jumo e avéle upande wangu, uti vaníngwambukanga. Kwashitendo ashi, havanavalangiligwe.

¹⁷UMU napane andípagwa namu nangu, akangupa dimongo pakulota dashi, kwaindila yangu nangu kuvalanganga kwalilove kutandeke-uti mpaka vamidi uti vaigwe. Namomo ndikaposhegwa nkanywa mwantumi

¹⁸na UMU ananguposha muvinu uti vyakunyata na anangutwala ngùvele nimumi kwautawala wake wakuwa. Kwake nae lipagwe lishangelo ngwengwe ngwengwe. Ame.

¹⁹Mupe nandele Pilishila namu Akila pamo na vapaing'ande imwe Oneshipolu.

²⁰Elashitu andiikala ku Kolintu kanji Tolopimu ninneka àvele nnwele ku Miletu.

²¹Napane tenda dimongo wide ukanava kuwika wakati washipwepwe. Ebulu, Pudente, Lino, Kalaudiya pamo na vanung'unumunu uti vandikutumidya nandele.

²²UMU apagwe pamo na imumu yako. Umonyo upagwe namu mwenu.