Read Ibibiliya mu Shimakonde Imbodi Yaambi na dimbande dya Imbodi Yakala Titu 3 Bible Online

Titu 3 - Ibibiliya mu Shimakonde Imbodi Yaambi na dimbande dya Imbodi Yakala bible

Titu 3

¹Vakumbuwange vapagwe mwina mwavakutawala na mwavamadalaka, vave vakwigwilila na vave tayali kwakula shimadengo shambone,

²havananniule munu, havanave vamagombi, vave vaupole valodya kulishapeya kwavanu uti.

³Mwaa ata nawetu kala po, tuvele tuvanu túkave ding'ano na túkaigwilila vatwashadyenge tuva tuvatumwa kwavinu vyakula inamuna na ditamaa, shingumi shetu tunama mushishimwashimwa na mwing'ou, tuvangadika na tuvangadyania.

⁴Kanji napane palyukile ndaumilila litananilo na linagwaledyo limwe Nnungu Mwamboli wetu kwavanu,

⁵i kwamwaa wavitendo vyetu vyaishaliya vyatutandile kanji kwamwaa washididi shake, nae anditwambola kwaindila yakuukangigwa kwakuvalekwa kwaambi na kudyuwangigwa kwa Imumu Wanashwe

⁶watumiminidile nae kwabila shipimo kwaindila imwe Yesu Klistu Mwamboli wetu

⁷kwambangidya dashi, wetu tùvalangiligwe ishaliya kwaumonyo wake, tuve tuvakupata-maleko kwodananavo lilindilililo lyashingumi shíkamalilika.

⁸Lilove ali, lyakukulupilika na kwavinu avi ninkulota doni, wako wigwiniye shana kwambangidya dashi, avalá vankulupíla Nnungu vaangaikangile kupagwa muvitendo vyambone. Vinu avi vyamana na vinkuvanavo paida kwavanu.

⁹Mitau napane víkave mana, linyemye pamo na lishauma lyavanyakala, ushaka na mitau kwamwaa walilamulo mwaa vinu avyo, havive mana na vyabule.

¹⁰Munu áidanavo kwapukanianga, ling'oto lyakunduma mwanda utandi na wambili, mwambukange

¹¹umanya doni munu wantindo au, andyashela na jojo jo ankutega, kwake jo mwene andilyukumu.

¹²Napanelo pangulota kuntumidya kwako wako Alitemashi kwali Tikiku, tenda dimongo wide ungukodye ku Nikopolishi mwaa ndyamuwa ngupagwe kwanavo muwakati washipwepwe.

¹³Likanyalidye kupwashela shimwanda shimwe Shenashi munu wadishaliya pamo namu Apolu kwambangidya hashinapagwe shakuvova.

¹⁴Vetu wetu vo, valipundishe kwangaikangila vitendo vyambone pakulota vaangangalange vinu vikumene vitakígwa na havanave vákapa vyepo.

¹⁵Uti avalá vapagwíte namu nangu vankukutumidya nandele. Nandele kwa avalá vatunagwalédya nkati mulikulupililo. Umonyo upagwe na uti mwenu.