Read Ibibiliya mu Shimakonde Imbodi Yaambi na dimbande dya Imbodi Yakala Pilemoni 1 Bible Online

Pilemoni 1 - Ibibiliya mu Shimakonde Imbodi Yaambi na dimbande dya Imbodi Yakala bible

Pilemoni 1

¹Paulu, nkúngwa kwamwaa umwe Klistu Yesu pamo namu nung'unumunu Timoti, kumwe Pilemoni mmádengomwetu wakunagwaleka

²pamo na numbumunu Apiya namu Alikipu mwíng'ondomwetu na liganisha likadyaniánga po paing'ande pako po.

³Umonyo upagwe kwenu mwenu pamo na amani vyakwalakela kumwe Nnungu Tatagwetu na kumwe UMU Yesu Klistu.

⁴Ngwengwe ninkunnambwalela Nnungu wangu pandikukumbukila wako nkati mukushwali kwangu

⁵mwaa ninkwigwa itangaleka yalinagwaledyo lyenu kwavakwilimyanga uti pamo na likulupililo lyamuvenavo kumwe UMU Yesu.

⁶Ninkujugwa doni, mukumajananga likulupililo lyenu lyuke likaing'e paida yakumanyila uti kula shinu shambone shipagwíte nkati mwetu kwaupande umwe Klistu.

⁷Mwaa linagwaledyo lyako liningupa lipuwilo likumene na kungupambadyanga pakuva mitima vyavakwilimyanga vindididimigwa kwaindila yako wako nung'unumunu.

⁸Napavedoni, ata ikava kenga nangu ninkuvanavo ntima wakutosha nkati mumwe Klistu kulota kukulamulila wako utende ashilá shikuvaikidíle,

⁹napane kwamwaa walinagwaledyo ndyona kudyanga ndikujugwangile, nene Paulu ngùvele ninang'olo namomo ambi apa ninkúngwa umwe Klistu Yesu.

¹⁰Ninkukujugwangila kwamwaa wamwanangu Oneshimu wanimmaleke nkati mukungwa kwangu,

¹¹jo ákashipai kala kanji napane ambi apa ankupai kwaupande wako wako na kwaupande wangu nangu.

¹²Nimuujiya kwako wako nae ni ntima wangu nimwene.

¹³Ishinangunagwela apagwe namu nangu pakulota angutumike adiva lyutu lyako pangungwa apa kwamwaa wantenga wambone.

¹⁴Napane kwabila kukubali wako nangu hangulatile kutenda shoeshoe kwambangidya wambone wako haunave wakukuungila kanji uve wakulota gwegwe umwene.

¹⁵Inkulukika nae andyápukananga namu wako muwakati padyoko kwambangidya apagwe namu wako ngwengwe

¹⁶i kavili kenga ntumwa kanji ankumpunda ntumwa, nung'unumunu wakunagwaleka. Amu ni mwavalalele kupunda namene kwangu nangu na ata kumamodya namene kwako wako ata mushimunu na ata mumwe UMU.

¹⁷Nadoni ikava kenga unkunguvalangilila kuva nkúmajanangamwavo, mpwashalele kenga mukangupwashaladíle nangu.

¹⁸Ikava kenga nae andikwanela wako kwali unkundai, bai vika vinu avyo mulipungu lyangu.

¹⁹Nangu Paulu ndyandika ibalugwa ai na nkono wangu nimwene; lideni alyo ndalipa pakulota hangunatangole doni, gwegwe umwene ninkukudai ata mpaka sho shingumi shako.

²⁰Elo nung'unumunu, nangu ngulota ngupate kwako paida nkati mumwe UMU; didimidya ntima wangu nkati mumwe Klistu.

²¹Nguvanavo wakika kwakwigwilila kwako, ndikwandikila ngumanya kenga undatandedya kupunda avi vyandikujugwile.

²²Pamo na avyo, ngupanganiyangidya lyutu lyakuwikila mwaa ninkulindila kenga kwaindila yakushwali kwenu vananguujidya kwenu.

²³Epapalashi nkúngwamwangu nkati mumwe Klistu Yesu ankuntumidya nandele.

²⁴Namomo Malukushi, Alishitaliku, Demashi namu Lukashi vamadengomwangu, vankuntumidya nandele.

²⁵Umonyo umwe UMU Yesu Klistu upagwe pamo na imumu yenu.