Read Ibibiliya mu Shimakonde Imbodi Yaambi na dimbande dya Imbodi Yakala Vabalaniya 12 Bible Online

Vabalaniya 12 - Ibibiliya mu Shimakonde Imbodi Yaambi na dimbande dya Imbodi Yakala bible

Vabalaniya 12

¹Napavedoni, pakuva nawetu momo inditutang'anedya imbumba ing'umene yamashuda ava, indituvaikila tulyulange uti vitudingadínga na lidambi litudingíla pakulota tutukute kwakulipililila kwamwaa wa alalá mashindano avikígwe mushu mwetu

²tunnola Yesu mwene nkútunduvanga na nkúwisha popo walikulupililo lyetu. Nae kwamwaa walipuwilo livikígwe mushu mwake, andilipililila panshalaba ailudyanga dyoni na andiikala kunkanakono pashiteng'u shake Nnungu.

³Mmikile namene kuntima aijá álipililidile kupingigwa kukumene kwavakutega kwamwaa wake jo mwene pakulota mwenu hamunadobe na ata hamunapungukigwe dimongo.

⁴Mukutenda ing'ondo lidambi, mwenu hamunava kupinga ata mpaka kuwikila shilinga shakujaa myadi.

⁵Da mwenu mundilivaliva akulá kulaililila kwantanana mwenu kenga mmanavake? “Mwanangu, haunailudyange kuduma kumwe UMU na ata haunapungukigwe dimongo muwakati wakushashulanga.

⁶Mwaa UMU ankunduma aijá wannagwaledya na ankumupa shaushanga kula munu wampwashalela kenga mwanamunu.”[50]

⁷Lipililile mauvilo enu kenga kudumigwa mwaa Nnungu ankuntanana kenga mmanavake. Da mwana shani ákapata shaushanga kwatatamunu?

⁸Ikava kenga mwenu hamunapata shinu shaushanga na shaushanga ashi vankuliinjidyanga vana uti, bai mwenu hamunava shinu mmanavake ila mmana mmakukanigwa.

⁹Leka apo, wetu tundivanavo vatatavetu vatuvaléke kwashimunumunu váshituduma na wetu tushindavaishimu. Da haivaikidile kulivika poe namene mwina mwatatagwetu waungumi pakulota tuname?

¹⁰Vatatavetu vashindatuduma muwakati ungwipi kwodananavo amulá mwavashoonela vene kuva mwambone kanji Nnungu ankutuduma kwauwambone wetu kwambangidya tukalyunganiange mukwilimyanga kwake.

¹¹Kuduma uti hakunanagwaleka pavaduma ila shiva shipalodi kanji napane ling'oto lyakuduma, vipatikananga vyepo vyaishaliya na amani kwa avalá vaukíle ndalinguligwa.

¹²Napavedoni nonowanga makono adabadabénge na malundi adidiménge.

¹³Kandyanga dindila dive dyashalowa kwamadodo enu kwambangidya dashi, aijá wakukudaila hanamamodye kanji apone.

¹⁴Likanyalidye pakulota muname nkati mu amani kwavanu uti na mukwilimyanga. Kwabila kupagwa mukwilimyanga, hapali álota kumwona UMU.

¹⁵Lishunge, hanapagwe wakulota kulinyemya muumonyo wake Nnungu; halunapagwe lushija lwakukalala[51] lwakwipuka pakati penu kutwala kutadya kumwangaishanga na kwambukishigwa vanu voe,

¹⁶hanapagwe munu pakati penu wakulauka kwali wadyeluelu álinganana kenga Ishau áshulushidye shinang'olo shake shakuva nae mwana ntandi kwandamu umo washakulya.

¹⁷Mwenu mundimanya do, ling'oto lyaukile ndalota apate kavili kwalaligwa kwashinang'olo shake, vanímwitila na halimpagwidídye kavili litala lyakulijugulangila ata ikava kenga nae ashindalambela kwalaligwa ako alila.

¹⁸Napanelo mwenu hamuwikile ata padyoko vela pavinu vye vivaikidíle kudabunya: moto ukaléla na ata pashii, na ata kudimba, na ata shimbunga,

¹⁹lidi lyalipalapanda na lidi lyamalove atadídye vaigwíte vo vajugwe doni, hatutamwa kwigwa kavili

²⁰mwaa havaulwíle kulipililila lilamulo likuvíke, “Ata mpaka nkoko álota kudabunya lishinga alyo, andaamangigwa majanga.”[52]

²¹Shitendo ashi shindyáneka kuva shakujowa ata mpaka Musha atédoni, “Ninkujopa na ninkutatamela.”[53]

²²Kanji napane mwenu mundiwika palishinga lya Shiyau, ku Yelusalemu yakuwa njini wake Nnungu mumi, kwavanjelo makumi manga pankodyanio walipuwilo,

²³kuliganisha lyavana vatandi kuvalekwa, vo vaandikígwe mena ave kuwa; mundiwika kwake Nnungu nkúukumu wavanu uti, kudimumu dyavanu vaishaliya ditandégwe kuwikila popo,[54]

²⁴mundiwika kumwe Yesu nkúdumangila waimbodi yaambi na myadi vyake vyamyajangidile, vitangóla shana kuliko myadi vimwe Abeli.

²⁵Lilaledye! Hamunamwite aijá átangola. Ikava kenga avalá vamwitíle aijá áshivaduma mushilambo amu havananwile, kushi wetu túmwambukanga aijá átuduma kwalakela kuwa?

²⁶Aijá átadidye wakati aulá lidi lyake lindangandeye shilambo ambi ankulivikila aashidoni, “Ndandangandeya mwanda unji kavili shilambo shapai kanji mwanda awo i gweka shilambo shapai kanji namomo na shakuwa.”[55]

²⁷Malove ala “Mwanda unji kavili” inkulilodya kenga vinu vindandangandegwa yani, vyumbígwe uti vindatimbikanga kwambangidya dashi, avilá víkandangandegwa vipagwe.

²⁸Napavedoni pakuva tunkupata utawala úkaululika kundangandegwa, indituvaikila tulambwalele[56] na tulipudye kwake Nnungu kwainamuna innagwéla, kwaishima na kwakunjopa

²⁹mwaa “Nnungu wetu ni moto utikinyúla.”[57]