Read Ibibiliya mu Shimakonde Imbodi Yaambi na dimbande dya Imbodi Yakala Vabalaniya 2 Bible Online

Vabalaniya 2 - Ibibiliya mu Shimakonde Imbodi Yaambi na dimbande dya Imbodi Yakala bible

Vabalaniya 2

¹Napavedoni indituvaikila tukamulile namene na dimongo uti avilá vyatwigwite kwambangidya hatunaashalange.

²Mwaa pakuva ntenga uvalangilígwe kwaindila yavanjelo undyanakananga kuva wakukulupilika, kula kupujungula na ungaigwilila undipata ukumu ivaikidíle.

³Napanelo tulota kupalanyoka dashi ikava kenga hatunatanana shinu kwambolegwa aku kukumene? Kwambolegwa aku kuvalangilígwe kunantandi namu UMU kutwala kuka ndaakikishiligwa kwetu wetu namu avalá vaigwíte

⁴akuno Nnungu aumya ushuda kwaindila yavimanyikilo, vyakutikinikanga na vyamakango vyoe pamo na vyajo vya Imumu Wanashwe vyajavile kulingananavo malotelo ake.

⁵Mwenu, havanava shinu vanjelo vavavikile Nnungu pakulota vatawale shilambo shilóta kwida shatuvalanganga;

⁶kanji leka apo, isemu inji yamaandiko vandyumya ushuda doni, “Munu ni nyani wakulota untanane? Kwali mwana wamunu ni nyani wakulota wako umwangaikangile?

⁷Wako unintenda padyoko tu kuva mwina mwavanjelo; uningwadya lidaka lyalishangelo na lyaishima,

⁸uti undivika mwina madodo ake.”[8] Mwenu, pashivika uti mwina mwake hashipali shalakile panda pakulota hashinatawaligwe namu nae. Kanji napane mpaka ambi, hatunona shinu vinu avyo vipagwa mwina mwake nae

⁹ila tunkumwona Yesu wauntandile padyoko tu kuva mwina mwavanjelo, waungwadidye lidaka lyalishangelo na lyaishima kwamwaa wakuvauvanga mukupela kwambangidya kwaumonyo wake Nnungu alinge kupela kwamwaa wavanu uti.

¹⁰Pavatwala vana voe kuvaukanavo kulishangelo, inimmaikila Nnungu kwamwaa umwe aijá na kwaindila imwe aijá átadya vinu uti vipagwe, antadye awikile popo[9] nkútunduvanga wakwambolegwa kwave kwaindila yamauvilo.

¹¹Mwenu, aijá átadya kwilimyanga na avalá vailimyangígwa, uti ava vankwalakela kwa aju, jumo. Napavedoni Yesu hanona dyoni yakuvashema vanavo vanung'unumunu

¹²paashidoni, “Ndavalanganga lina lyako kwavanung'unumunu pakati panguguvale, ndakutumbyanga.”[10]

¹³Namomo ankushidoni, “Nangu ndavika likulupililo lyangu nkati mwake.”[11] Kavili kushidoni, “Lola, ninkupagwa apa pamo na vana vangupele Nnungu.”[12]

¹⁴Doni, pakuva vana ava vankuvanavo mavalelo ashimunu, nanae momo andíliinjidyanga mumavalelo ashimunu pakulota kwaindila yakupela, andime aijá ávenavo lyululilo lyakupedya yani Ndamoni;

¹⁵namomo avavike muunaiti uti avalá ve vapagwíte muutumwa mushingumi shave uti vajopa kupela.

¹⁶Mwaa kwaumwiu nae hanavaangaikangila shinu vanjelo kanji angaikangila udukulu umwe Abulaamu.

¹⁷Kwamwaa au, inimmaikila nae atandegwe kuva wakulinganana na vanung'unumunu nkati mumavalelo pakulota ave nang'olo washididi na nkúlangalalela-shadaka nkumene wakukulupilika áigwania namu Nnungu kwambangidya atandedye kudimanga shitundi kwamwaa washimadambi shavenentete.

¹⁸Pakuva jo mwene andyuvauvanga mukutubigwa, ambi apa ankuulula kuvapwashela avalá vatubígwa.