Read Ibibiliya mu Shimakonde Imbodi Yaambi na dimbande dya Imbodi Yakala Vabalaniya 3 Bible Online

Vabalaniya 3 - Ibibiliya mu Shimakonde Imbodi Yaambi na dimbande dya Imbodi Yakala bible

Vabalaniya 3

¹Napavedoni mmanung'unumunu mmakwilimyanga múliinjidyanga pamo mukushamegwa kwakuwa, vikila namene kuntima makumbukililo enu kumwe Yesu, myombe na nkúlangalalela-shadaka nkumene wakulyaula kwetu.

²Nae andikulupilika kumwe aijá ántandwele kenga mo mwaukilile ndakulupilikila Musha mwing'ande uti yani venentete vake Nnungu.

³Yesu andivaikila avalangiligwe lishangelo likumene kuliko Musha, nimumo momo nkúdenga ing'ande ni ánapata ishima kuliko yo yene ing'ande.

⁴Mwaa ing'ande uti idangegwa na munu kanji nkúdenga wavinu uti ni Nnungu.

⁵Doni, Musha andíkulupilika mwing'ande uti ya Nnungu kenga ntumika áumya ushuda wa avilá vilóta kutangaleka wakati wamushu;

⁶kanji Klistu andikulupilika kenga mwana ávenavo madalaka amwing'ande uti ya Nnungu. Napane ing'ande yene yo, ni wetu ikava kenga tundashunga kwadimongo kukulupila kwetu na alilá lilindilililo lyatulitumbyangidya.

⁷Doni, kenga mwatangalela Imumu Wanashwe, “Muliduva lyanelo ikava kenga munkwigwa lidi lyake,

⁸hamunananope mitima vyenu kenga mukupinga, kenga muliduva alilá lyakulinga kushimbweshe,

⁹lyavangulingile vanyakalavenu vangutenda nningo, ata ikava kenga muvyaka alubaini vandyona vitendo vyangu.

¹⁰Napavedoni ndíshimwa kwamwaa wavanu vaimbula ayo kutwala kushidoni, ‘Mitima vyave ngwengwe vinkuka vyashalanga, vanavo havanamanya shinu dindila dyangu.’

¹¹Nadoni ndililapa nkati mushitundi shangu, ‘Mwiko havainjila mukupumula kwangu.’ ”[13]

¹²Lilaledye mmanung'unumunu, hanapagwe munu pakati penu wantima waukalau na waungakulupila untadya aapukananganavo Nnungu mumi.

¹³Leka apo, ing'ana ntima shii kula wakati ushamégwa “Liduva lyanelo” kwambangidya hanapagwe pakati penu munu wakunanopa aduwangika mulidambi

¹⁴mwaa wetu tuukilé ndaliinjidyanga nkati mumwe Klistu ikava kenga mwiu tundakamulila mpaka kumwisho likulupililo lyetu lyatupatile kunantandi.

¹⁵Ni ashi shitangaléka doni, “Muliduva lyanelo ikava kenga munkwigwa lidi lyake, hamunananope mitima vyenu kenga mukupinga.”[14]

¹⁶Da vakwashi vaigwíte kanji kutwala kupinga? Da havanava shinu avalá vaumíle ku Mishili valangalalegwa namu Musha?

¹⁷Da vakwashi vavavikidile Nnungu shitundi muvyaka alubaini? Da havanava shinu avalá vatagíle kutwala mili vyave kushikigwa kushimbweshe?

¹⁸Namomo, vakwashi valilapidile Nnungu kenga mwiko havainjila mukupumula kwangu? Havanava shinu avalá vákamwigwilidile?

¹⁹Bai tunkwona ngala doni, havaulwile kwinjila kwamwaa waungakulupila.