Read Ibibiliya mu Shimakonde Imbodi Yaambi na dimbande dya Imbodi Yakala Vabalaniya 4 Bible Online

Vabalaniya 4 - Ibibiliya mu Shimakonde Imbodi Yaambi na dimbande dya Imbodi Yakala bible

Vabalaniya 4

¹Napavedoni pakuva kulivikila aku kwakwinjila mukupumula kwake Nnungu kunkupagwa mpaka ambi, bai indituvaikila tujope kwambangidya hanapagwe ata jumo pakati penu wakwanakananga kukowa mene kuwikila shabaa.

²Mwaa kwetu wetu vandituvalangangila ntenga wambone kenga vanavo momo kanji lilove lyavaigwite hashipali shavakatakadile kwoda lilove alyo, havapwashadile kwalikulupililo avalá vaigwíte.

³Kanji kwetu wetu túukile ndakulupila tunkwinjila amulá mukupumula kulingana kenga mwatangaladile Nnungu, “Nadoni ndililapa nkati mushitundi shangu, ‘Mwiko havainjila mukupumula kwangu,’ ”[15] ata ikava kenga shimadengo shake shindimalilika tangu kukandyangigwa kwashilambo.

⁴Mwaa mwimbande inji yamaandiko nae anditangola doni kwamwaa waliduva lyasaba, “Kutwala muliduva lyasaba lyo Nnungu andípumula shimadengo shake uti.”[16]

⁵Kavili mwimbande ailá inkushidoni, “Mwiko havainjila mukupumula kwangu.”[17]

⁶Napanelo pakuva lipali litala lyakwinjila vanji mukupumula kwake na pakuva avalá vavalangilígwe ntenga wambone kaladavo havainjidile kwamwaa waungaigwilila,

⁷kavili ankuvika liduva linji lyavashema “Liduva lyanelo” patangwele kwaindila imwe Daudi ling'oto lyakupita wakati woe kwodananavo avilá vitangaléke kaladavo, “Muliduva lyanelo ikava kenga munkwigwa lidi lyake, hamunananope mitima vyenu.”[18]

⁸Mwaa leka Yoshuwa àvapele kupumula, Nnungu hanatangole kavili ing'ano yaliduva linji.

⁹Napavedoni linkupagwa liduva lyakupumula kwavenentete vake Nnungu

¹⁰mwaa aijá áinjidile mukupumula kwake Nnungu, nae ankupumula shimadengo shake kenga mwapumulidile Nnungu shimadengo shake.

¹¹Napavedoni, tulikanyalidye kwinjila mukupumula ako kwambangidya hanapagwe wakugwa aodedya mpano wowo waungaigwilila.

¹²Mwaa lilove lyake Nnungu lingumi na linkuvanavo dimongo, namomo lyakukola kupunda lyambila likóla kuvili, lyanavo linkupulunganianga pakati-pakati ungumi na imumu, mumagwangwa na muwoba, namomo linkujavanianga makumbukililo na milugu vyamuntima.

¹³Hashipali shuumbígwe shilipiídye pamevo pake Nnungu. Uti vivelé mwandwa na palangele pamevo pamwe aijá patulota wetu kwitikanga.

¹⁴Napavedoni pakuva tunkuvanavo nkúlangalalela-shadaka nkumene-uti áinjidile kuwa, Yesu Mwana wake Nnungu, indituvaikila tunanope mu ashilá shatulyaula.

¹⁵Mwaa nkúlangalalela-shadaka nkumene watuvenavo ankuulula kutwanangila shididi mukudabadabanga kwetu. Kanji leka apo, munu kenga wetu nae andyuvauvanga dinamuna uti dyakutubigwa kwabila kutenda shimadambi.

¹⁶Nadoni tuvandikile shiteng'u shaumonyo kwantima shii kwambangidya twanangiligwa shididi na tukakodye umonyo wakulota kutupwashela muwakati ulotéka.