Read Ibibiliya mu Shimakonde Imbodi Yaambi na dimbande dya Imbodi Yakala Vabalaniya 6 Bible Online

Vabalaniya 6 - Ibibiliya mu Shimakonde Imbodi Yaambi na dimbande dya Imbodi Yakala bible

Vabalaniya 6

¹Napavedoni tuleke mapundisho akutunduvanga kwamwaa umwe Klistu na tuke mushu nkati mukukulumuka kwabila kudenga kavili shitunduvangilo yani, kulijugulanga kwavitendo vyakupela, likulupililo kwa Nnungu,

²mapundisho aubatisho, akuvavikila vanu makono, akudyuka kwavakupela na aukumu íkamalilika.

³Asho shindatandeka ikava kenga Nnungu andatupa litala.

⁴Mwenu, hayululika kwa avalá ve vapatíle lilangadyo, valingíle inudyo yakuwa, valiinjidyénge mu Imumu Wanashwe,

⁵valingíle wambone walilove lyake Nnungu pamo na dimongo dyawakati ulóta kwida

⁶kutwala vanavo vo kwambukanga kuululika kavili kuvaukanavo mukulijugulanga mwaa kwavo vo vene vo, vankunkamela kavili panshalaba Mwana wa Nnungu na kuntaa dyoni paumbala.

⁷Mwaa ulongo upáta imbula itanyéla kula wakati na umédya vilyo vyapaida kwankúlima, wanavo unkupata kwalaligwa kwake Nnungu.

⁸Kanji ukamedya miva na nashilanga, hauve mana na uvé pepi na kupata dilana, kumwisho kwake kutaigwa moto.

⁹Kwenu mwenu mmakunagwaleka, ata ikava kenga tunditangola kwainamuna ai, tunkuvanavo wakika wakupagwa kumanyikanga kwavinu vipagwíte nkati mukwambolegwa.

¹⁰Nnungu hanava shinu waungave-ishaliya wakulota kulivaliva shimadengo shenu na linagwaledyo lyamuladidye kwamwaa walina lyake pakuva mundivatumika vakwilimyanga na munkuka mushu muvatumika.

¹¹Shitunagwéla wetu, kula munu pakati penu alodye dukuduku yoyo mpaka kumwisho pakulota apate wakikisho wiu walilindilililo lyetu

¹²kwambangidya hamunave mmawondo kanji vajedye avalá kwaindila yalikulupililo na kulipililila vandipata maleko akulivikila.

¹³Mwenu, Nnungu palivikidile kumwe Abulaamu, pakuva hapagwíte munu nkúmene walyululilo kuliko nae wakulota kulilapila lina lyake, nae andílilapila jo mwene

¹⁴aashidoni, “Mwiu, ndakwalaliya na ndakulundulila poe namene udukulu.”[22]

¹⁵Ivédoni, ling'oto limwe Abulaamu kulindila kwaupole, nae andípata ashilá shaukile ndalivikila Nnungu.

¹⁶Mwaa vanu vandálilapila kwalina limwe aijá nang'olo kuliko vanavo na kulilapa ni kwakikisha mudimakanila uti.

¹⁷Nadoni Nnungu palotile kulodya kwabila kwambambidya malotelo ake ákabadilika kwavakupata-maleko akulivikila, nae andyakikisha kwakulilapa

¹⁸kwambangidya dashi kwaindila yavinu vivili vikabadilika, vyo víkaululika Nnungu kushang'apa, wetu tunkuulula kuvanavo kupambadyangigwa pakulota kukamulila shana lilindilililo lyavavikile mushu mwetu wetu tútukutidile kwa Nnungu.

¹⁹Alyo tunkuvanavo kenga inanga yaungumi wetu, íkajagajega na yauwakika, lilindilililo lipaléta mwinguvo yamulyutu lyakwilimyanga-uti

²⁰ko kwaukile Yesu kenga nashilangola, andiinjila yetu wetu atandegwa kuva nkúlangalalela-shadaka nkumene ngwengwe kwodananavo aulá upangaji umwe Malikishadeki.