Read Ibibiliya mu Shimakonde Imbodi Yaambi na dimbande dya Imbodi Yakala Vabalaniya 7 Bible Online

Vabalaniya 7 - Ibibiliya mu Shimakonde Imbodi Yaambi na dimbande dya Imbodi Yakala bible

Vabalaniya 7

¹Mwenu, Malikishadeki aju avele umu wa ku Shalemu[23] na jojo jo, avele nkúlangalalela-shadaka wake Nnungu Wapashanya-uti, nae andíkadyania namu Abulaamu, Abulaamu auja kukuvatema vaumu nae kutwala kumwalaliya.

²Abulaamu anímupa Malikishadeki lipungu lyakumi lyavinu uti. Shitandi lina lyake linkuvanavo mana, “umu waishaliya” namomo avele umu wa ku Shalemu, yani “umu waamani.”

³Ata have tatake, have anyoke, have udukulu na ata havenavo shitunduvangilo shamaduva kwali mwisho washingumi shake; kanji vankunninganianga na Mwana wa Nnungu mwaa ankuva nkúlangalalela-shadaka ngwengwe ngwengwe.

⁴Lola ukumene wamunu aju: ata mpaka nyakala Abulaamu animupa lipungu lyavinu uti vyatwéte mateka!

⁵Mmalamulo linkupagwa lilamulo líishidoni, pakati paudukulu umwe Lawi avalá vatandalégwa pakulota vave vakulangalalela-shadaka indivaikila vapate lipungu lyakumi lyakwalakela kwavenentete, yani vàvele vo vanung'unumunu ava, ata ikava kenga vanavo momo ni udukulu umwe Abulaamu.

⁶Kanji napane munu aju ákapali muudukulu wavanalawi, nae andipwashalela lipungu lyakumi limwe Abulaamu kutwala kumwalaliya aijá ávenavo vyakulivikila vyake Nnungu.

⁷Mwenu, kwabila kwambambidya ndyoko ni áalaligwa na nang'olo.

⁸Kwaupande unji vapwashalaléla lipungu lyakumi ni vanu vapéla kanji apa ápwashalela lipungu lyakumi vankumuumidya ushuda kenga nae, ankunama.

⁹Inkuululika kutangaleka doni, ata jo mwene Lawi ápwashalela lipungu lyakumi, nae andyumya lipungu lyakumi kwaindila imwe Abulaamu

¹⁰mwaa Lawi mpaka apo àvele nkati mumwe Abulaamu nyakala wake ni pakadyanienge Malikishadeki namu Abulaamu.

¹¹Muunanangalaledi wakulangalalela-shadaka wavanalawi ni mwavapatilile venentete lilamulo, napane leka yùlulike venentete kuwikila popo,[24] shikaloteke nyamani kavili kuumililila nkúlangalalela-shadaka junji kwaupangaji umwe Malikishadeki i kwaupangaji umwe Aloni?[25]

¹²Mwaa unanangalaledi wakulangalalela-shadaka ukabadilika, lilamulo momo lindivaikila libadilike.

¹³Mwenu, wavimwamba vinu avi jo, avele wamuudukulu unji udukulu úkantumike ata padyoko vela Nnungu kwalutali

¹⁴mwaa inkumanyika ngala doni, UMU wetu ni wamuudukulu umwe Yuda udukulu wákaambangidile mwaa Musha kwaing'ano ailá yavakulangalalela-shadaka.

¹⁵Vyatumalidile kutangola vinkulilodya namene ngala paumilidile nkúlangalalela-shadaka junji álinganene namu Malikishadeki,

¹⁶munu ávikigwe kuva nkúlangalalela-shadaka i kwakwoda shilotéka kwalilamulo lyaudukulu kanji kwakwoda dimongo dyashingumi shake shíkaululika kubamolegwa.

¹⁷Mwaa Maandiko ankumya ushuda yake nae, “Wako ni nkúlangalalela-shadaka ngwengwe kwodananavo upangaji umwe Malikishadeki.”[26]

¹⁸Napavedoni kwaupande unji lilamulo litandi, vandiputanga mwaa wakuva lyakudabadabanga na líkave mana

¹⁹mwaa lilamulo litandi halyulwile kutandedya shinu shoeshoe kuwikila popo[27] kanji kwaupande unji, vandiingula lilindilililo lyamana na kwaindila yalyanavo tunkuulula kummandika Nnungu.

²⁰Ashi hashitandeke kwabila kulilapa! Mwaa avalá váshitandegwa kuva vakulangalalela-shadaka, vashitandegwa kwabila kulilapa

²¹kanji nae anditandegwa namu Nnungu kuva nkúlangalalela-shadaka, jo álilapidile jo amwaulidile doni, “UMU andililapa na halyambila shinu, ‘Wako ni nkúlangalalela-shadaka ngwengwe.’ ”[28]

²²Nadoni jo Yesu aju, anditandegwa kuva shakwimididya mwimbodi yamana.

²³Mwenu, avalá vakulangalalela-shadaka váshitandegwa voe mwaa kupela ashindavadivilila pakulota havanaukenavo mushu shimadengo shave

²⁴kanji pakuva Yesu ankunama ngwengwe, nae ankuvanavo unanangalaledi úkamalilika.

²⁵Napavedoni nae ankuulula kuvaambole-uti avalá vammandíka Nnungu kwaindila yake pakuva jojo jo, ankunama ngwengwe pakulota kuvajungwangila vanavo.

²⁶Indituvaikila kuvanavo nkúlangalalela-shadaka nkumene kenga aju: wakwilimyanga, ákave makosha, waungave-udagwa, ávilinganenge na vakutega, wavankwadidye kuwa-uti.

²⁷Kwakuvilingananga na vakulangalalela-shadaka vakumene avalá, nae hainatakigwa shinu kulyumidya shadaka kula liduva kwamwaa washimadambi shake ling'oto shimadambi shavenentete. Nae anditenda uti avi kwamwanda umo tu bai palyumidye jo mwene.

²⁸Mwaa lilamulo linkuvavika vanu muungalyulula wave kuva vakulangalalela-shadaka vakumene kanji akulá kulilapa kwaléke ling'oto lyamalamulo, kunimmika Mwana átandagwidye kuwikila popo ngwengwe.[29]