Read Ibibiliya mu Shimakonde Imbodi Yaambi na dimbande dya Imbodi Yakala Vabalaniya 8 Bible Online

Vabalaniya 8 - Ibibiliya mu Shimakonde Imbodi Yaambi na dimbande dya Imbodi Yakala bible

Vabalaniya 8

¹Mwenu, shikumene shatwambangila mwaa apa ni ashi, tunkuvanavo nkúlangalalela-shadaka nkumene kenga aju jo áikele kunkanakono washiteng'u shimwe aijá Wakujowa walishangelo, kuwa

²na ankutumika mulyutu Lyakwilimyanga ìvele yema iu yadangile UMU i munu.

³Kula nkúlangalalela-shadaka nkumene ankushaguligwa pakulota aumye dinudyo na vyadaka; nadoni indivaikila nanae momo avenavo shakumya.

⁴Leka nae àpagwite mushilambo shapai ashi, ata hainaulukike kuva nkúlangalalela-shadaka nkumene kwoda vapali avalá vaúmya shadaka kwodananavo lilamulo.

⁵Shavatumika vanavo ni lilodyo vila na shimbedi shavinu vivéle kuwa. Musha pashilota kudenga yema Nnungu animwaulila kaladavo doni, “Lilaledye, tenda kula shinu kwodananavo lilodyo lyandikuladidye akulá kulishinga.”[30]

⁶Kanji napane ambi apa utumika wapatile Yesu wo, ni wambone kuliko wavanavo, nadoni kenga mo, imbodi intadídye nae ave nkúdumangila waimbodi yamana kupunda yakala, yoyo yo inkunanapela muvyakulivikila vyamana.

⁷Mwaa leka imbodi itandi ikavenavo makosha, hainapagwe yakulambalalegwa yambili.

⁸Kanji napane Nnungu andyóna kupagwa shoovíte kwavenentete kutwala kushidoni, “Mwenu, andawika maduva, atangola UMU, pangulota kupanga imbodi yaambi na shipinga shavanaishilaeli pamo na shipinga shavayuda.

⁹Haiva shinu kenga imbodi yangupangíle na vanyakalavave pandivakamwile nkono ndivaumya kushilambo sha ku Mishili; kwoda vanavo vo, havananwepe mwimbodi yangu, nangu apa ndivaambukanga,” atangola UMU.

¹⁰“Doni, ai ni imbodi yangulota kupanga na shipinga shavanaishilaeli ling'oto lyamaduva alo,” atangola UMU. “Ndavika malamulo angu muding'anong'ano dyave, na ndaandika mmitima vyave. Nindava Nnungu wave, vanavo vo, vandava venentete vangu.

¹¹Hapali álota kumpundisha kavili nshitanonomwagwe na ata nung'unumunu aashidoni, ‘Mmanye UMU,’ mwaa uti vanavo vanangumanya, kutunduvangila ndyoko na nkulu.

¹²Mwaa ungave-shaliya wave nangu ndavaanangila shididi, na shimadambi shave hangukumbukila kavili.”[31]

¹³Patangola Nnungu yaimbodi yaambi yakala yo nae anditadya ipite na wakati; napane ashilá shipitíle wakati na shikangapéle, asho shinkuka mukulambaleka.