Read Ibibiliya mu Shimakonde Imbodi Yaambi na dimbande dya Imbodi Yakala Tiyagu 1 Bible Online

Tiyagu 1 - Ibibiliya mu Shimakonde Imbodi Yaambi na dimbande dya Imbodi Yakala bible

Tiyagu 1

¹Nangu Tiyagu ntumwa wake Nnungu na umwe UMU Yesu Klistu, ninkuntumidya nandele vampate makola kumi na mbili amwadilikanénge muvilambo uti.

²Mmanung'unumunu, muwakati wamupata malingo akula inamuna ona uti kuva uti lipuwilo

³mwaa mundimanya kenga kulingigwa kwalikulupililo lyenu kunkwidanavo kulipililila.

⁴Nadoni leka kulipililila kuvenavo shimadengo shakuwikila popo kwambangidya mwenu muve mmashalowa-uti[1] na mmakulinganana kwabila kumwova shoeshoe.

⁵Ikava kenga munu pakati penu linkumwova limanyilo, anjugwe Nnungu ávapa vanu uti kwabila shinyadinyadi na ákashulanga; namomo nae andamupa.

⁶Anjugwe nae kanji kwalikulupililo kwabila kwambambidya mwaa aijá áambambidya jo, ankuva kenga liwimbi lyamwimanga línatwaligwa na kugang'alegwa kwaimepo.

⁷Munu ajo hanakumbukile kenga andapata shinu shoeshoe kumwe UMU

⁸mwaa ankuvanavo makumbukililo auju kuvili na ákananopa nkati mushinamidyo shake.

⁹Nung'unumunu wakwiludyangika inimmaikila alyumye shumbi mukukwela kwake

¹⁰kanji napane ntajili inimmaikila alyumye shumbi mukushuluka kwake mwaa nae andapita kenga induva yamumwitu;

¹¹liduva lindáuma, palinavala namene po, maukutu andajuma kutwala dinduva kupakatika na kwalala kwake ko, kutimbikanga. Nimumo momo ntajili andatimbikanga pakati pashimadengo shake.

¹²Andyalaligwa munu álipililila nkati mmalingo mwaa ling'oto lyakukubaligwa, andapata lidaka lyashingumi lyalivikidile Nnungu kwa avalá vannagwalédya.

¹³Hanapagwe wakutubigwa kutwa kushidoni, “Nnungu ankungutubya.” Mwaa Nnungu hanatubigwa na vinu vyakunyata na ata jo mwene Nnungu hapali wantubya.

¹⁴Kanji kula munu ankutubigwa kwamwaa wamalotelo ake jo mwene na ni lolo anshómba na ambulúsha.

¹⁵Napanelo malotelo ala akaimita livalekwa lidambi kutwala lidambi palikulumuka po, limmaleka kupela.

¹⁶Mmanung'unumunu mmakunagwaleka, hamunaduwangike;

¹⁷kula inudyo yambone na kula shajo uti shakulinganana vinkwalakela kumwe Atata mwene vinu vyakuvala vyakuwa, jojo ákaangaikanga kenga shimbedi na ata ákajalukanga.

¹⁸Kwamalotelo ake jo mwene, nae andituvaleka kwaindila yalilove lyake lyaumwiu kwambangidya tuve kenga vyepo vitandi muviumbe vyake.

¹⁹Mmanung'unumunu mmakunagwaleka, manya vinu avi: kula munu inimmaikila apajeke kwigwa kanji akakove kutangola na akakove kushimwa

²⁰mwaa shitundi shamunu hashinaidanavo shinu ishaliya yake Nnungu.

²¹Napavedoni, jaa kushu ko ushapu uti na mavalelo akunyata alinatéla na pwashalela lilove lipandígwe nkati mwenu kwabila makukulu, lyolyo livénavo dimongo lyakwambola ungumi wenu.

²²Ava mmanu mmakutandedya alilá lilove, hamunave mmakwigwa vila muliduwanga mwemwe mmene.

²³Aijá áigwa lilove kutwala mene kutandedya, ankulinganana na munu álilola ing'ope yake mushilolo;

²⁴nadoni ling'oto lyakulilola, pauma apo kutwala kulivalivinneu mwashi mwavalalele.

²⁵Kanji napane álaledya shana lilamulo lyashalowa-uti líidanavo unaiti, jo ánanopa na ákalivaliva ashilá shaigwite ila atandedya, ajo andaalaligwa kwa ashilá shatenda.

²⁶Ikava kenga munu ankulyona kuva munu waidini kanji hanatawala shinu lulimi lwake, ankuliduwanga jo mwene muntima mwake, idini yake yo, yabule.

²⁷Idini yaungave-ushapu na yaungave-udagwa pamevo pake Nnungu Atata ni ai: kuvalola vananshiva na vanamwili nkati mumashida avo, namomo kulishunga gwegwe umwene pakulota shilambo hashinakupake lilemba.