Read Ibibiliya mu Shimakonde Imbodi Yaambi na dimbande dya Imbodi Yakala Tiyagu 2 Bible Online

Tiyagu 2 - Ibibiliya mu Shimakonde Imbodi Yaambi na dimbande dya Imbodi Yakala bible

Tiyagu 2

¹Mmanung'unumunu, pakuva munkuvanavo likulupililo kumwe Yesu Klistu UMU wetu walishangelo, hamunampambule munu.

²Tuke tulole: nkati mumikodyanio vyenu ainjila munu àgwete myala vyake dipete dyashaabu, namomo àgwalenge dinguvo dyakuvailanga kutwala yadavo kwinjila munu mmashikini àgwete dinguvo dyakunyambikanga

³kutwala mwenu kuntanana ágwete dinguvo dyakuvailanga kumwaulila kushidoni, “Ikala apa palyutu lyambone,” namomo kumwaulila aijá mmashikini doni, “Imila akulá” kwali “ikala pai panguvikile madodo angu,”

⁴da davo po, hamunalipambulanianga shinu mwemwe mmene mulitenda kuva vakuukumu kwamakumbukililo akunyata?

⁵Igwa mmanung'unumunu mmakunagwaleka, da Nnungu havatandwele vamashikini pamevo pavanu vamushilambo pakulota vave matajili nkati mulikulupililo na vapate maleko autawala walivikidile nae kwa avalá vannagwalédya?

⁶Kanji mwenu munkumwiludyanga mmashikini. Da havanava shinu matajili vannivatíla na kumbulusha vamuukanavo kulibengi?

⁷Da i vanavo vakupúlu lina lyambone lyavampele mwenu?

⁸Ikava kenga mwenu mwiu munkutandedya lilamulo lyashiumu litangaléka mumaandiko liishidoni, “Nnagwaledye mujo kenga mo mwaulinagwaladyedya umwene,”[2] davo po, munkutenda shana.

⁹Kanji mukavapambula vanu, munkutenda lidambi na munkuukumigwa tayali mulilamulo kenga mmanu múpujungula.

¹⁰Mwaa aijá áigwilila lilamulo uti kutwala mo nkati mo kulikuvala lilamulo limo, ajo ankuva wamakosha auti.

¹¹Ivedoni, aijá átangwele doni, “Haunalavalave,”[3] namomo anditangola doni, “Haunabyae.”[4] Ikava kenga mwenu hamunalavalava shinu kanji munkubyaa, bai munkupujungula lilamulo.

¹²Tangola kenga na tandedya kenga mmanu múlota kuukumigwa kwalilamulo lyaunaiti;

¹³ukumu haivanavo shinu shididi kwa avalá vákalodidye shididi. Shididi shindatema paukumu.

¹⁴Mmanung'unumunu, inkupagwa paida shani munu kutangola doni, “Ninkuvanavo likulupililo,” ikava kenga havenavo vitendo? Da likulupililo alyo linkuulula kumwambola nae?

¹⁵Ikava kenga nung'unumunu nnume kwali nkongwe ankuvanavo wou na kumwova shakulya shakula liduva

¹⁶kutwala munu jumo pakati penu kumwaulila doni, “Wena kwaamani, kapate ntukuta na kalye wikute,” kanji kwabila mwenu kumupa nae vinu vitakígwa pamili pake, inkupagwa paida shani?

¹⁷Nimumo momo likulupililo gweka yake likanavanavo vitendo, lyo lyene lindipela.

¹⁸Inkulukika munu kushidoni, “Wako unkuvanavo likulupililo, nangu ninkuvanavo vitendo.” Ngulodya likulupililo lyako líkavele vitendo nangu ndakulodya likulupililo lyangu kwaindila yavitendo.

¹⁹Wako unkukulupila kenga ankupagwa Nnungu jumo? Unkutenda shana! Ata vo vandamoni vo, vankukulupila shinu asho na vankutatamela.

²⁰Unjinga gwe! Da valota vakulodye kenga likulupililo bila vitendo, halive mana?

²¹Tatagwetu Abulaamu ashindalota amumye shadaka mwanamunu Ishaki pashanya alutali; da hapatile ishaliya kwaindila yavitendo vyake?

²²Unkwona, likulupililo pamo na vitendo vyake vindikola shimadengo pamo, namomo kwaindila yavitendo likulupililo lindíwikila popo.

²³Nadoni andiwikila popo Maandiko atédoni, “Abulaamu aninkulupila Nnungu, likulupililo lyolyo, UMU jo animmalangilila Abulaamu kuva ishaliya;”[5] nadoni nae andíshamegwa kuva mbwadigwe Nnungu.

²⁴Munkwona, munu ankupata ishaliya kwaindila yavitendo i gweka kwaindila yalikulupililo.

²⁵Kenga mo mwaivalalele kumwe Laabe nkongwe lilaja áukile ndavapwashalela vakupalalesha kutwala kuvaumidya indila inji, da hapatile ishaliya kwaindila yavitendo vyake?

²⁶Nadoni mili kwabila imumu undipela, namomo likulupililo kwabila vitendo, lindipela.