Read Ibibiliya mu Shimakonde Imbodi Yaambi na dimbande dya Imbodi Yakala Tiyagu 3 Bible Online

Tiyagu 3 - Ibibiliya mu Shimakonde Imbodi Yaambi na dimbande dya Imbodi Yakala bible

Tiyagu 3

¹Mmanung'unumunu, pakati penu mmoe hamunave mmamwalimu mwaa mwenu mundimanya kenga wetu túpundisha po, tundaukumigwa poe.

²Kwakutangola mwiu wetu uti tunkulikuvala mudinamuna dyoe. Ikava kenga munu hanalikuvala shinu kwashitangodi, munu ajo ankuva washalowa-uti, namomo ankuulula kutawala mili wake uti.

³Patunavaunga dimbuu vakavalu ndikanywa mwave tulota vanavo vatwigwilile, tunkuvalangalalela momo mili vyave uti.

⁴Namomo lola mpano wadimeli, ata ikava kenga dyanavo ding'umene na kugang'alegwa na imepo ing'umene, dindalangalalegwa na ing'wau idikidiki namene ilodya kwoekwoe kwodananavo malotelo mwalota kwamulila nkútukusha.

⁵Nimumo momo lulimi ni imbandi idikidiki yamumili kanji inkulitamangila vinu vikumene. Lola mwitu ukumene úndakalela kwayee idikidiki tu, yamoto.

⁶Nadoni lulimi yadavo ni moto na lilangalanga lyaungave-shaliya. Lwanavo lunkuvanavo lyutu lyake pakati padimbandi dyamili vyetu, lunkumwambukisha mili uti, lunkukaledya shingumi uti; lwo lwene lwo lundikalela moto walakéla kushena.

⁷Mwenu, munu ankutawala namomo anditawala kula likola lyavanyama uti, vyuni, vakoko vakulyuta na viumbi uti vyamwimanga;

⁸kanji napane hapali munu áulula kutawala lulimi. Lwanavo ni ukalau úkaululika kutawaligwa, lundyumbala ishumu ibyáa.

⁹Na lwo lulimi alu tunkuntumbyangidya UMU Atata, namomo na lwo lulimi tunkuvataa dilana vanu vakandyangígwe kwaing'ope yake jo mwene Nnungu.

¹⁰Kwalaliya na dilana dinkuma mo nkanywa. Mmanung'unumunu, hainave davo!

¹¹Da inkuululika muto umo wowo kuma medi akunogwa na medi akulalama?

¹²Mmanung'unumunu, inkuululika mwembe kutwala kupa malalange kwali mpapaja kupa membe? Nimumo momo muto wamedi akulalama hayululika kuma medi akunogwa.

¹³Wakwashi pakati penu walimanyilo na avénavo ding'ano? Bai alodye vitendo vyake kwaindila yamavalelo ake ambone atandeka kwabila makukulu nkati mulimanyilo.

¹⁴Kanji ikava kenga mmitima myenu munkuvanavo ing'ou yakujowa na malotelo augweka, hanapagwe wakulitamanga na ata hamunalishang'apile umwiu.

¹⁵Shinamidyo ashi hashinalangalalegwa shinu na limanyilo lyakwalakela kuwa ila ni lyashilambo sho shapai ashi, lyashivalakwelo na lyashindamoni.

¹⁶Mwaa paipagwite ing'ou na malotelo augweka, apo pankupagwa ungaigwania na dinamuna uti dyavitendo vyakunyata.

¹⁷Kanji napane limanyilo lyalakéla kuwa, lyanavo shitandi halive ushapu; ling'oto kuva lyamani, kulimaladya, kwigwilila, kuumbaligwanavo shididi na vyepo vyambone, líkamwapula munu na líkave shinankulaba.

¹⁸Vo vaídanavo amani vo, vankupanda imbeju yaamani na vankupata mapuno aishaliya.