Read Ibibiliya mu Shimakonde Imbodi Yaambi na dimbande dya Imbodi Yakala Tiyagu 4 Bible Online

Tiyagu 4 - Ibibiliya mu Shimakonde Imbodi Yaambi na dimbande dya Imbodi Yakala bible

Tiyagu 4

¹Ding'ondo na kupwatananga vipagwíte pakati penu po, vyalakela kwashi? Da havinaalakela shinu nkati muditamaa dyenu adilá dyakunyata ditandána ing'ondo nkati mwenu mo?

²Mwenu munkung'unuka, napane kwoda hamunapata shinu, munkubyaa. Munkuvanavo ing'ou kanji kwoda hamunaulula shinu kupata ashilá shamulota, ni ashi shampwatana na kutandana ing'ondo. Hashipali shamuvenavo mwaa hamunajugwa shinu.

³Pamujugwa, hamunapata shinu mwaa munkujugwa kwamalotelo akunyata kwambangidya mujaange muditamaa dyenu.

⁴Mmakulavalava! Da hamunamanya shinu kenga kupangana imbodi na shilambo ni umongo namu Nnungu? Álota ave mbwadimunu washilambo, nae ankulitenda kuva mmongo wake Nnungu.

⁵Kwali munkwona kenga Maandiko àtangaleke monyo patédoni, Imumu wantadidye nae apagwe nkati mwetu ankuvanavo mweshe waliloko?[6]

⁶Ila nae ankutuumbadya umonyo namene kenga mwatangalela Maandiko, “Nnungu ankuvapinga vakulyona kanji ankuvapa umonyo avalá valishapéya.”[7]

⁷Napavedoni mwishimu Nnungu. Mwite Ndamoni nae po, anantukuta;

⁸mmandike Nnungu, nanae momo anammandika! Tadya makono enu atakate mwenu mmakutega, mwemwe múvenavo makumbukililo auju kuvili, ushanianga ushapu mmitima vyenu.

⁹Avanavo shipalodi, tangadikanga na lila, kweka kwenu kujalukange kuve kutangadikanga na lipuwilo lyenu lijalukange shive shipalodi.

¹⁰Lishapeye pamevo pake UMU na jojo jo, anantumbudya.

¹¹Mmanung'unumunu, hamunatangalane kunyata. Aijá ántangola kunyata nung'unumunu kwali ámuukumu nung'unumunu, ankutangola kunyata lilamulo na ankuukumu. Wako paukumu lilamulo po, haunatandedya shinu ila unkulivika kuva unkúukumu.

¹²Nkúumya-lilamulo na nkúukumu nae ni jumo tu bai aijá áulula kwambola na kubamola. Kanji napane wako po unyani úmuukumu mujo?

¹³Napanelo igwa mwenu múushidoni, “Nelo kwali lunduno tundauka kunjini au kwali njini aulá ndaikala mwaka umo, ako tundatenda nshulusho kutwala kupata njuluku.”

¹⁴Mwemwe mmene mukamanyite ashilá shilóta kutandeka lunduno. Shingumi shenu ni nyamani? Mwenu munkuva kenga itabwe yumilíla wakati padyoko, kukungulukinneu.

¹⁵Kudyanga kutangola doni, “UMU akalota tundanama na tundatenda ashi kwali ashilá.”

¹⁶Kanji napane mwenu munkulitamanga nkati mukulyona kwenu; kulitamanga aku, kundinyata.

¹⁷Bai aijá ámanyite wambone kutwala mene kutenda, kwake nae jo ni lidambi.