Read Ibibiliya mu Shimakonde Imbodi Yaambi na dimbande dya Imbodi Yakala Tiyagu 5 Bible Online

Tiyagu 5 - Ibibiliya mu Shimakonde Imbodi Yaambi na dimbande dya Imbodi Yakala bible

Tiyagu 5

¹Napanelo igwa mwenu mmatajili! Lila na tangadikanga kwamwaa wamauvilo alóta kumwidila.

²Mali enu andyunda na dinguvo dyenu dindimamanegwa na vamalapende.

³Shaabu na lyava lyenu vindishuja. Kushuja koko ko, kundaumya ushuda ummalanganga mwenu na kundalya mili vyenu na moto. Mwenu mundilikungailila mali mumaduva ala amwisho.

⁴Lola, nshala wavamadengo vapuníle mmashamba enu, mwenu mundivakililisha, wanavo unkulamadikanga. Kutangadikanga kwavakupuna, kwanavo kundiigwinika kumatu kumwe UMU Wavaing'ondo.

⁵Mwenu mushilambo amu mundinama shinamidyo shíkave lyuduku na shakulitumbyanga, namomo mundilinyateya mitima vyenu mumaduva akushindanga.[8]

⁶Mundimuukumu na kummyaa munu waishaliya, nae mene kupinga.

⁷Napavedoni mmanung'unumunu ava mmanu mmakulipililila mpaka kwida kumwe UMU. Nnole nkúlima mwanalindililila ulongo umye vyepo vyamana. Nae análipililila mpaka ulongo utanyele imbula itandi na yamwisho.

⁸Namwenu momo ava mmanu mmakulipililila na mmakunonowanga mitima vyenu mwaa kwida kumwe UMU, kundivandika.

⁹Mmanung'unumunu, hamunakashalyane kwambangidya hamunaukumigwe. Mwenu, Nkúukumu jo avelé pannango.

¹⁰Mmanung'unumunu, tenda kenga mpano wamauvilo na kulipililila kwa avalá vakulava vatangwéle palina limwe UMU.

¹¹Mwenu, tunkuvashema vakwalaligwa avalá valipililidíle. Mwenu mundigwa itangaleka kulipililila kumwe Jobi, namomo mundyona kumwisho kwake UMU mwashi mwaukile nantananila mwaa ntima wake UMU ni wakuumbaligwa lilotelo na ni washididi.

¹²Mmanung'unumunu pashanya pavinu avi uti, hamunalilapile kuwa kwali shilambo shapai na ata kwali kulilapa kwoekwoe. Kwenu mwenu mukatangola doni, “Elo” ive mwiu elo na mukatangola doni, “Mene” ive mwiu mene kwambangidya hamunapatikanange muukumu.

¹³Pakati penu apali áuvauvanga? Ashwalye. Apali avénavo lipuwilo? Aimbe dimu dyalutumbyango.

¹⁴Pakati penu apali nnwele? Avasheme vanang'olo valiganisha pakulota vashwalye kwamwaa wake nae vampaka mauta palina limwe UMU.

¹⁵Nadoni kushwali kwalikulupililo kunkuntadya nnwele apone na UMU anantakatuwa. Namomo ikava kenga anditega, andalivalivigwa shimadambi shake.

¹⁶Napavedoni, valanganila madambi enu na shwalyanidya pakulota mupone. Kushwali kwamunu waishaliya kunkuvanavo dimongo dyakutandeka vinu vyoe.

¹⁷Liyashi avele munu áumbigwe kenga wetu, nae andíshwali na ntima pakulota imbula hainatonye; imbula indíimila kutonya mushilambo amu wakati wamyaka mitatu na inusu.

¹⁸Nae andíshwali kavili kuwa ko kushimuka kutonya imbula kutwala shilambo sho, kupa vyepo.

¹⁹Mmanung'unumunu, ikava kenga pakati penu apali álota aambukange umwiu kutwala munu junji kumuujiya;

²⁰manya doni, aijá ámuujiya nkútega áambukenge indila yake, aju andaambola ungumi wamunu ajo mukupela na andaputangigwa madambi akwinjipa.