Read Ibibiliya mu Shimakonde Imbodi Yaambi na dimbande dya Imbodi Yakala I Patulu 3 Bible Online

I Patulu 3 - Ibibiliya mu Shimakonde Imbodi Yaambi na dimbande dya Imbodi Yakala bible

I Patulu 3

¹Nimumo momo mwenu mmadyamunu livike mwina mwavatavenu kwambangidya ata ikava kenga vanji havanakulupila shinu lilove lyake Nnungu, vapatikanange kwabila malove kwamwaa washinamidyo shenu mwenu mmadyavave;

²vona shinamidyo shenu shíkave ushapu na shaishima.

³Kunema kwenu hakunave kwapanda kenga mwakulukila ugwimbu, kugwalangila vinu vyashaabu kwali dinguvo dyakunamikanga;

⁴leka apo, inimmaikila mulinemye mmitima vyenu kunema kúkatimbikanga nkati mwimumu yaupole na yakutulila ivénavo mana makumene namene kwaupande wake Nnungu.

⁵Mwaa amu ni mwavashinamela vakongwe vakwilimyanga vapanyuma váshivika lilindilililo lyave nkati mu Nnungu. Vanavo kula munu ashindalivika mwina mwantwamunu

⁶kenga Shalaa ashindamwigwilila Abulaamu na kunshema kuva nang'olo wake. Kwake nae ko, mwenu mundava mmanavake ikava kenga mundatandedya wambone na mukanajopa mitishango.

⁷Namomo mwenu mmatwamunu ava mmanu mmalimanyilo nkati mukunama na vadyavenu na vatanane kwaishima kenga shinu shíkanama mwaa ni vakupata-maleko pamo namu mwenu muumonyo washingumi kwambangidya kushwali kwenu ko, hakunadiviligwe.

⁸Kumwisho akuno ninkushidoni, avanavo makumbukililo amulolo, ava mmashididi, nagwaladyania shinung'unumunu, ava mmanu mmakutanana na mmakulishapeya.

⁹Hamunalipilile wakunyata kwawakunyata, hamunalipilile kutukana kwakutukana kanji paikavele davo po, vaalaliye mwaa ni ashi shavanshamalele mwenu kwambangidya mupate kwalaligwa.

¹⁰Mwaa “Aijá álota kunagwaledya shingumi na kunama maduva ambone, ashunge lulimi lwake kwavyakunyata, dindomo dyake hadinashang'ape;

¹¹aambukange wakunyata na atandedye wambone; alambele amani na avingilidye.

¹²Mwaa mevo ake UMU ankuvalola avalá vaishaliya na matu ake ankuvaigwilila kushwali kwave kanji ing'ope imwe UMU inkuvapinga avalá vatandédya vyakunyata.”[11]

¹³Mwenu, da nyani álota kuntenda kunyata ikava kenga mwenu munkuvanavo dukuduku yakutenda wambone?

¹⁴Kanji ikava kenga mundauvauvanga kwamwaa waishaliya, mwenu po mundaalaligwa. “Hamunavajope vanavo; namomo hamunashushukange.”[12]

¹⁵Leka apo, ntumbyange Klistu UMU kenga wakwilimyanga nkati mmitima vyenu. Ava tayali ngwengwe pakulota kunjang'ula aijá álota kunjugwa mwenu amanye mana alilindilililo lipagwíte nkati mwenu.

¹⁶Kanji tenda vinu avi kwaupole na kwaishima mushunga makumbukililo ambone amuntima kwambangidya dashi, avalá vantangóla mwenu kunyata kwamwaa washinamidyo shenu shambone shamupagwa nkati mumwe Klistu, vanavo vavenavo dyoni kwakuliula kwave.

¹⁷Kudyanga kuvauvanga kwamwaa wakutandedya wambone ikava kenga ni malotelo ake Nnungu kuliko kuvauvanga utandedya wakunyata.

¹⁸Mwaa mwiu Klistu andyuvauvanga mwanda umo tu bai kwamwaa walidambi, munu waishaliya kwamwaa wavanu vaungave-ishaliya pakulota kutuukanavo kumwe Nnungu. Nae kwashimunu[13] vanimpedya kanji vanindyuwa kwa Imumu

¹⁹na mu Imumu jojo andyúka ndavalangangila dimumu divéle mukungwa,

²⁰dyo díkashiigwilila muwakati wakala Nnungu pashilindila kwaupole mumaduva amwe Noe paishikandyangigwa ingalava. Mwanavo ni vanu padyoko tu vapukíle mmedi, vanu avo vavele nane.

²¹Nadoni ashi ni shimanyikilo shaubatisho umwambóla mwenu ambi apa, wanavo haunaushanianga shinu ushapu washimunu ila ni kulijugwangila kwamakumbukililo ambone amuntima pamevo pake Nnungu kwaindila yakudyuka kwake Yesu Klistu

²²ákwadile kuwa kwikala kunkanakono kwake Nnungu kutwala kuvavika vanjelo mwina mwake, madalaka pamo na dimongo uti.