Read Ibibiliya mu Shimakonde Imbodi Yaambi na dimbande dya Imbodi Yakala I Patulu 5 Bible Online

I Patulu 5 - Ibibiliya mu Shimakonde Imbodi Yaambi na dimbande dya Imbodi Yakala bible

I Patulu 5

¹Doni, nangu ninang'olomwenu na ninshuda wamauvilo amwe Klistu namomo wakuliinjidyanga mulishangelo lilóta kuunukuligwa, ninkuvalaililila vanang'olo vapagwíte pakati penu,

²shunga shipinga shavangandolo vake Nnungu shavankamudidye: mwenu, laledya shanavo i kwakuvakanyalidya kanji kwamalotelo ambone kenga mwalatela Nnungu na ata i kwaditamaa dyanjuluku kanji kwadukuduku yakutumika;

³hamunavatawale avalá vamuukile ndakulupiligwa kanji ava mpano kwashipinga asho.

⁴Doni, palota kulilodya Nkúshunga nang'olo, mwenu mundapata lidaka lyalishangelo líkadingala.

⁵Nimumo momo mwenu mmanemba livike mwina mwavanang'olo. Mwenu uti gwala kulishapeya pakulota muulule kutumikana mwaa “Nnungu ankuvapinga vakulyona ila ankuvapa umonyo vakulishapeya.”[16]

⁶Lishapeye mulivika mwina makono adimongo dyake Nnungu kwambangidya antumbudye mwenu muwakati uvaikidíle

⁷munjalela nae mangaikangilo enu uti mwaa nae ankumwangaikangila mwenu.

⁸Ava mevo na lilaledye: mmongo wenu mwenu Ndamoni ankudingukanga kenga ntumi akalamanga annambela wakwashi wakulota kummamane-uti.

⁹Mpinge, nanopa nkati mulikulupililo lyenu mumanya doni, vanung'unumunumwenu mushilambo amu uti vankupata inamuna yamauvilo lolo.

¹⁰Nnungu waumonyo uti ánshamile mwenu kwalishangelo lyake líkamalilika nkati mumwe Klistu Yesu, jojo jo ling'oto lyakuvauvanga mwenu padyoko, anandyuwangidya, andamwakikisha, andamupa dimongo na anammika pashanya shitunduvangilo.

¹¹Kwake nae lipali lyululilo ngwengwe ngwengwe. Ame.

¹²Kwalipwashalelo limwe Shilivanu aijá wanimwamini kuva nung'unumunu wakukulupilika, nangu ndimwandikila mwenu kwaungwipi ninjugwangila na ngumyaa ushuda kenga: au ni umonyo wiu wake Nnungu. Pagwa mukunanopa nkati muumonyo wake Nnungu.

¹³Avalá vavéle ku Babiloni vakutandalegwa kenga mwenu vankuntumidya nandele kwenu mwenu pamo na mwanangu Malukushi.

¹⁴Tumidyania nandele kwashimanyikilo shalinagwaledyo. Amani ipagwe kwenu mwenu uti múvele nkati mumwe Klistu.