Read Ibibiliya mu Shimakonde Imbodi Yaambi na dimbande dya Imbodi Yakala II Patulu 1 Bible Online

II Patulu 1 - Ibibiliya mu Shimakonde Imbodi Yaambi na dimbande dya Imbodi Yakala bible

II Patulu 1

¹Simoni Patulu, ntumwa na myombe umwe Yesu Klistu, kwa avalá vapatíle likulupililo lyolyo livénavo mana alinganána na lyetu kwaindila yaishaliya imwe Nnungu wetu, Mwamboli Yesu Klistu.

²Umonyo na amani vyanjadyeke kwenu mwenu kwaindila yakummanya Nnungu namu Yesu UMU wetu.

³Kwadimongo dyaunnungu wake anditupa uti avilá vyatulota mushingumi na mukunjopa nae kwaindila yakummanya aijá átushamile kwalishangelo lyake jo mwene na kwaushalowa wake uti

⁴kwaindila yavyanavo nae andilivikila vikumene na vyamana kwetu wetu kwambangidya dashi kwaindila yavyakulivikila, mwenu muke mukave mmakuliinjidyanga mumavalelo aunnungu mùpalanyweke muudagwa upagwíte mushilambo kwamwaa wamalotelo ashimunumunu.

⁵Kwaing'ano yoyo ai, tumbama namene mutadye likulupililo lyenu mwanjadyedye muushalowa; muushalowa nkati mulimanyilo,

⁶mulimanyilo nkati mukulishunga gwegwe umwene, mukulishunga gwegwe umwene nkati mukunanopa, mukunanopa nkati mukunjopa Nnungu,

⁷mukunjopa Nnungu nkati mukunagwaladyania shinung'unumunu na mukunagwaladyania shinung'unumunu, mulinagwaledyo.

⁸Ikava kenga vinu avi vipali pakati penu na vinkukulumuka, vyanavo vindatadya hamunave mmawondo na múkapa vyepo mukummanya UMU wetu Yesu Klistu.

⁹Mwaa aijá ákavenavo vinu avi, andiputala ankwona bai vyapepi àlivalidile kuushaniangigwa ushapu washimadambi shake shakala.

¹⁰Napavedoni mmanung'unumunu, kavili likanyalidye namene pakulota kushamegwa na kutandalegwa kwenu kunanope mwaa mukatenda avyo, mwiko hamulikuvala.

¹¹Mwaa kwainamuna ai mwenu mundapata aki yakwinjila kwabila kundingadinga shoeshoe muutawala úkamalilika umwe UMU wetu na Mwamboli Yesu Klistu.

¹²Nadoni ngwengwe ndauka mushu ninkumbuwanga vinu avi ata ikava kenga mwenu mundimanya na munkunanopa nkati muumwiu aulá wamupatile.

¹³Ninkwona kuva shinu shivaikidíle panguvele mwiyema yamili au nimwimulange nkati mumakumbukililo ala

¹⁴mwaa ndimanya doni, kwashipajelo nangu ndajaa yema ai kwodananavo amulá mwanguunukulidile UMU wetu Yesu Klistu.

¹⁵Nadoni ninkulikanyalidya na dimongo kwambangidya ling'oto lyakunyema kwangu mushilambo amu, mwenu mukumbukile vinu avi kula wakati.

¹⁶Kwamwiu, patummalangangidile dimongo na kwida kumwe UMU wetu Yesu Klistu, hatwodile mikong'o vyavapanganienge shana kanji wewe tuvene ni tuvashuda túgwene ukumene wake.

¹⁷Nae andipata ishima na lishangelo lyakwalakela upande umwe Nnungu Atata, muwakati aulá walimwididile lidi lyaléke mulishangelo lyakujowa litédoni, “Aju ni Mwanangu, Wakunagwaleka wangu, ángupa lipuwilo;”[1]

¹⁸wewe tuvene tundigwa lidi ali lyalakela kuwa tùvele pamo namu nae palishinga lyakwilimyanga.

¹⁹Nadoni pashanya avi, tunkunanopa namene nkati mulilove lyavakulava kenga ikalaboi ilangádya pashii, namwenu momo tandedya mwigwa shana mpaka wiku paulota kulangala na palilota kuma lyalosho mmitima vyenu.

²⁰Kupunda namene manya doni, hapali malove apagwíte nkati mumaandiko avalangangidile munu abuni jo mwene;

²¹mwaa mwiko malove alo hapandukenge mumalotelo ashimunumunu kanji vanu vandivalanganga kwalakela upande wake Nnungu valangalalegwa kwa Imumu Wanashwe.