Read Ibibiliya mu Shimakonde Imbodi Yaambi na dimbande dya Imbodi Yakala I Nshuwau 2 Bible Online

I Nshuwau 2 - Ibibiliya mu Shimakonde Imbodi Yaambi na dimbande dya Imbodi Yakala bible

I Nshuwau 2

¹Mmanavangu, ninkumwandikila vinu avi kwambangidya hamunatege. Kanji aijá átega, tunkuvanavo wakutushililidya kumwe Atata, Yesu Klistu, Waishaliya.

²Nae ni shadaka shakudimanga shitundi shake Nnungu kwamwaa wamadambi etu kanji i kwamwaa wamadambi etu gweka, namomo madambi amushilambo uti.

³Namomo tundimanya kenga tunkummanya nae patwigwilila malamulo ake.

⁴Aijá aashidoni, “nangu nae nimmanya” kanji pakaigwilila malamulo ake, nshwang'a na kwake nae umwiu haupali

⁵kanji aijá áigwilila lilove lyake, nkati mwake nae, mwiu linagwaledyo lya Nnungu linkuwikila popo.[1] Mwatumanyila kupagwa nkati mwake ni amu,

⁶aijá aashidoni, ankupagwa nkati mwake nae inimmaikila awene kulingana kenga mo mwawanadile Yesu.

⁷Mmakunagwaleka! Haninamwandikila shinu lilamulo lyaambi kanji lilamulo lyakala, lyo lyamuvénavo kunantandi; lilamulo alyo lyakala ni wo ntenga wamwigwite.

⁸Ata ivedavo, ninkumwandikila lilamulo lyaambi ashilá shiu nkati mwake na mwenu mwaa shii shinkuka shilambaleka na lilangadyo liu tayali linkulangala.

⁹Aijá áashidoni, ankupagwa mulilangadyo kanji ámmangedya nung'unumunu, mpaka ambi avelé mushii.

¹⁰Aijá ánnagwaledya nung'unumunu ankupagwa mulilangadyo na nkati mwake hashipali shakuntadya alikuvale.

¹¹Kanji aijá ámmangedya nung'unumunu ankupagwa mushii na ankuwena mushii. Nae hanamanya shinu kwauka mwaa shii shinimputadya mevo.

¹²Mmanavangu, ninkumwandikila mwaa madambi enu andilivalivigwa kwamwaa walina lyake.

¹³Mmababa, ninkumwandikila mwaa munimmanya aijá ápagwite kutunduvangila kunantandi. Mmanemba, ninkumwandikila mwaa munintema aijá nkalau.

¹⁴Mmanavangu, nimwandikila mwaa munimmanya Atata. Mmababa, nimwandikila mwaa munimmanya aijá ápagwite kutunduvangila kunantandi. Mmanemba, nimwandikila mwaa mwenu munkuvanavo dimongo, lilove lya Nnungu linkupagwa nkati mwenu na munintema aijá nkalau.

¹⁵Hamunanagwaledye shilambo na ata vinu vipagwíte amo. Aijá ánagwaledya shilambo, linagwaledyo kumwe Atata halipali nkati mwake

¹⁶mwaa uti vipagwíte mushilambo amu yani malotelo ashimunumunu, liu, kulyumidya shumbi kwamali amushinamidyo ashi, uti avi havinava shinu vimwe Atata ila vyashilambo sho shashi.

¹⁷Shilambo ashi pamo na malotelo ake ankumalilika kanji aijá átandedya malotelo ake Nnungu andapagwa ngwengwe.

¹⁸Mmanavangu, au ni wakati wamwisho. Mo mwamwigwididye kenga mmongo wake Klistu andaida, bai vamongo voe vamwe Klistu vandyumilila tayali, napavedoni tunkumanya kenga au ni wakati wamwisho.

¹⁹Vanavo vandilyumadyanga pakati petu kanji havavéle vetu wetu mwaa leka vàvele vetu wetu vakandipagwa namu wetu kanji vanavo vandilyumadyanga pakulota imanyike ngala kenga pakati pave wetu wetu hapagwíte ata jumo.

²⁰Mwenu napane munkuvanavo kupakigwa kumwe Wakwilimyanga na mwenu uti munkuvanavo limanyilo.

²¹Shanimwandikidile mwenu i do, hamumanyite umwiu kanji ni kwamwaa mwenu mundimanya na kwamwaa kushang'apa uti hakupali kwalakéla muumwiu.

²²Da nshwang'a ni wakwashi? Nshwang'a ni aijá ántauka Yesu kuva Klistu; munu aju ni mmongo wake Klistu jo ántauka Tatamunu na Mwanamunu.

²³Kula munu ántauka Mwanamunu namomo havenavo Tatamunu; aijá ammalanganga Mwanamunu namomo ankuvanavo Atata.

²⁴Kanji kwaupande wenu mwenu ashilá shamwigwite kunantandi shipagwe nkati mwenu. Ikava kenga ashilá shamwigwite kunantandi shindapagwa nkati mwenu, mwenu momo mundapagwa nkati mumwe Mwanamunu namu Atata.

²⁵Nadoni shalivikidile nae kwetu wetu ni ashi: shingumi shíkamalilika.

²⁶Vyangumalidile kumwandikila avi ni kwamwaa wa avalá vanduwánga.

²⁷Kanji kwaupande wenu mwenu kupakigwa kwamupatile kwake nae, kunkupagwa nkati mwenu na mwenu hamunatakigwa shinu munu ampundishe. Kwoda kupakigwa kwake kunkumpundisha mwenu kwamwaa wavinu uti na kwaumwiu hakunashang'apa shinu, pagwa nkati mwake kulingana kenga mo mwampundishididye.

²⁸Mmanavangu napanelo pagwa nkati mwake nae kwambangidya dashi, palota kulilodya tuvenavo ntima shii patukalinyemya pamevo pake kwamwaa wadyoni.

²⁹Kwoda mwenu mundimanya kenga nae ni waishaliya namomo manya doni uti vanatandedya vyaishaliya vandivalekwa kwaindila yake.