Read Ibibiliya mu Shimakonde Imbodi Yaambi na dimbande dya Imbodi Yakala I Nshuwau 3 Bible Online

I Nshuwau 3 - Ibibiliya mu Shimakonde Imbodi Yaambi na dimbande dya Imbodi Yakala bible

I Nshuwau 3

¹Mwenu, da linagwaledyo shani lyaladidye Atata kwetu wetu ata mpaka wetu kuka ndashamegwa vana va Nnungu, namwiu nimomo mwatuvalalele. Nadoni shilambo hashitumanyite mwaa nae havammanyite momo.

²Mmakunagwaleka, wetu napanelo ni tuvanavake Nnungu na mwatulota kuvalela mo hamunava kulilodya; napane palota kwida po, tundava kenga nae mwaa tundamwona kenga mo mwavalalele.

³Kula munu ánanapela lilindilililo lyake nkati mwake nae, ankulyushanianga jo mwene ushapu kulingana kenga mo mwavalele nae ákave ushapu.

⁴Kula ánatenda shimadambi namomo ankutenda ungave-lilamulo mwaa lidambi ni ungave-lilamulo.

⁵Mwenu mundimanya kenga nae andída pakulota aushaniange madambi na nkati mwake nae halipali lidambi.

⁶Kula ápagwa nkati mwake hanatega shinu; kula ánatega, hangwene na ata hammanyite.

⁷Mmanavangu, hamunanneke munu anduwanga; aijá átandedya vyaishaliya ni waishaliya kenga mwavalalele nae waishaliya.

⁸Aijá ánatenda shimadambi umwe Ndamoni mwaa Ndamoni ni wakutega ngwengwe tangu kunantandi. Ni asho shaidilidile Mwanagwe Nnungu pakulota abamalangile-uti vitendo vimwe Ndamoni.

⁹Kula ávalakwadidye kwaindila ya Nnungu hanatenda shimadambi mwaa ankuvanavo mavalelo ake Nnungu nkati mwake; haulula kutenda shimadambi mwaa andivalekwa kwaindila ya Nnungu.

¹⁰Amu ni mwavaliladyedya vanavake Nnungu na vanavake Ndamoni: woewoe ákatandedya vyaishaliya hanava shinu wake Nnungu na ata aijá ákannagwaledya nung'unumunu, momo.

¹¹Doni, au ni ntenga wamwigwite tangu kunantandi: wewe tuvene, tunagwaladyanie.

¹²Hatunave kenga Kaimu munu umwe nkalau ámpadidye nung'une. Mwaa shani animpedya? Mwaa Kaimu vitendo vyake vivele vyashikalau na vyannung'une kuva vyaishaliya.

¹³Mmanung'unumunu, hamunashange shilambo pashimmangedya.

¹⁴Wetu tundimanya kenga tundyuma mukupela kuka mushingumi mwaa tunkuvanagwaledya vanung'unumunu. Aijá ákave linagwaledyo ankupagwa nkati mukupela.

¹⁵Aijá ámmangedya nung'unumunu ajo ni shimalivanu; mwenu mundimanya kenga hapali shimalivanu ávenavo nkati mwake shingumi shíkamalilika.

¹⁶Mwatumanyidile linagwaledyo ni amu: Yesu Klistu andijaula shingumi shake kwamwaa wetu wetu na wetu leka tujaule shingumi shetu kwamwaa wavanung'unumunu.

¹⁷Kanji napane aijá ávenavo mali ashilambo ashi akamwona nung'unumunu aijá wavimwovite kutwala kunanopa ntima, da linagwaledyo lya Nnungu lilota kumpagwidya dashi nkati mwake?

¹⁸Mmanavangu, hatunanagwaledye kwalilove na kwapakanywa kanji muvitendo na muumwiu.

¹⁹Davo tundamanya kenga wetu ni tuvaumwiu, tundatudya mitima vyetu pamevo pake

²⁰pavituukumu tulyona kenga tunditega. Mwaa Nnungu ni nkumene kupunda mitima vyetu na ankumanya kula shinu.

²¹Mmakunagwaleka, ikava kenga mitima vyetu havituukumu shinu, bai tunkuvanavo ntima shii pamevo pake Nnungu

²²na kula shinu shatunjugwa nae, tunkupata kwalakela kwake mwaa tunkwigwilila malamulo ake na kutandedya vyapuwangila.

²³Napanelo lilamulo lyake ni ali: tukulupile lina lya Yesu Klistu Mwana wa Nnungu na tunagwaladyanie kenga mwatulamulilila nae.

²⁴Aijá áigwilila malamulo ake ankupagwa nkati mwake Nnungu na nae nkati mwake. Tundimanya kenga nae ankupagwa nkati mwetu kwaindila ya Imumu watupele.