Read Ibibiliya mu Shimakonde Imbodi Yaambi na dimbande dya Imbodi Yakala I Nshuwau 5 Bible Online

I Nshuwau 5 - Ibibiliya mu Shimakonde Imbodi Yaambi na dimbande dya Imbodi Yakala bible

I Nshuwau 5

¹Kula ákulupila Yesu yakuva Klistu,[2] ajo andivalekwa kwaindila ya Nnungu na kula ánnagwaledya nkúvaleka, namomo anánnagwaledya aijá wammaleke nkúvaleka ajo.

²Amu ni mwatumanyila kenga tunkuvanagwaledya vanavake Nnungu patunnagwaledya Nnungu na patutandedya malamulo ake.

³Amu ni mwatunnagwaladyedya Nnungu kwaupande wetu: patwigwilila malamulo ake na malamulo ake lo, hanaidopa shinu.

⁴Kula ávalakwadidye kwaindila ya Nnungu anatema shilambo na aku ni kutema kwantamile shilambo, likulupililo lyetu.

⁵Da nyani átema shilambo? Ni gweka aijá ákulupila kenga Yesu ni Mwana wa Nnungu.

⁶Aju ni aijá áalakadile kwaindila yamedi na yamyadi, Yesu Klistu i gweka kwaindila yamedi kanji namomo kwaindila yamedi na yamyadi. Imumu ni áing'a ushuda mwaa Imumu ni umwiu.[3]

⁷Vapali vatatu vaumya ushuda:

⁸Imumu, medi na myadi, vatatu ava ushuda wave uvelé umo.

⁹Ikava kenga tunkukulupila ushuda wavanu, ushuda wa Nnungu ni úvenavo mana makumene mwaa au ni ushuda waumya Nnungu kwamwaa wa Mwanagwe.

¹⁰Aijá ánkulupila Mwana wa Nnungu, ankuvanavo ushuda au nkati mwake. Aijá ákankulupila Nnungu, ankuntenda kuva nae nshwang'a mwaa hanakulupila shinu ushuda waumya Nnungu kwamwaa wa Mwanagwe.

¹¹Ushuda wene wo ni au: Nnungu anditupa shingumi shíkamalilika na shingumi ashi shinkupagwa nkati mwa Mwanagwe.

¹²Aijá ávenavo Mwana, ankuvanavo shingumi na aijá ákavenavo Mwana wa Nnungu, havenavo shingumi.

¹³Nimwandikila mwenu vinu avi mwemwe múkulupila lina lya Mwana wa Nnungu kwambangidya mumanye kenga munkuvanavo shingumi shíkamalilika.

¹⁴Au ni ntima shii watuvenavo kwa Nnungu: patujugwa kwodananavo malotelo ake, nae ankutwigwa.

¹⁵Nadoni pakuva tunkumanya kenga nae ankutwigwa kwa ashilá shatunjugwa, tunkumanya kenga tundipata tayali avilá vyatujugwile.

¹⁶Ikava kenga munu anamwona nung'unumunu atega lidambi líkamuukanavo kukupela, anjugwangile na Nnungu andamupa shingumi; andavapa avalá vaténda lidambi líkavaukanavo kukupela. Lipali lidambi livaúkanavo vanu kukupela, nadoni kwa alyo, hangunatangola shinu mwenu mujugwangile.

¹⁷Ungave-shaliya uti ni lidambi kanji lipali lidambi líkamuukanavo munu kukupela.

¹⁸Tundimanya kenga uti aijá ávalakwadidye kwaindila ya Nnungu hanatega ila ávalakwadidye mu Nnungu ananshunga na aijá nkalau, hamwavalela.

¹⁹Wetu tundimanya kenga tuvake Nnungu kanji shilambo uti shivele mwina mwankalau.

²⁰Namomo tundimanya kenga Mwana wa Nnungu andida na anditwing'a limanyilo kwambangidya tummanye aijá Waumwiu. Na wetu tunkupagwa nkati mumwe aijá Waumwiu kwaindila ya Mwanamunu, Yesu Klistu. Aju ni Nnungu Waumwiu na shingumi shíkamalilika.

²¹Mmanavangu, lishunge kwavannungu vakushang'apa.