Read Ibibiliya mu Shimakonde Imbodi Yaambi na dimbande dya Imbodi Yakala II Nshuwau 1 Bible Online

II Nshuwau 1 - Ibibiliya mu Shimakonde Imbodi Yaambi na dimbande dya Imbodi Yakala bible

II Nshuwau 1

¹Kwanang'olo kuka kwankongwe wakutandalegwa pamo na vanavake,[1] vo vandivanagwaledya kwaumwiu na i gweka nangu ndivanagwaledya kanji namomo uti avalá vamanyíte umwiu,

²kwamwaa waumwiu upágwa nkati mwetu na ulóta kupagwa kwetu wetu ngwengwe.

³Umonyo, shididi na amani vyakwalakela kumwe Nnungu Tatamunu na kumwe Yesu Klistu Mwana wa Tatamunu, vindapagwa namu wetu nkati muumwiu na mulinagwaledyo.

⁴Ndipuwanga poe pandivakadidye vanavako vanji vawena muumwiu kulingana kenga mwatupatidile lilamulo kwalakela kumwe Atata.

⁵Nadoni nangu ninkukujugwa mama i do, ninkukwandikila lilamulo lyaambi kanji alilá lyatuvenavo tangu kunantandi: doni, tunagwaladyanie.

⁶Linagwaledyo lyo ni ali: tuwene kwodananavo malamulo ake. Lilamulo lyo ni ali: kenga mo mwamwigwididye mwenu kunantandi, wena mulinagwaledyo alyo.

⁷Mwaa vakuduwanga voe vandyumilila mushilambo amu na vovo vo, havanammalanganga shinu Yesu Klistu kwida mushimunu. Amu ni mwavalalele nkúduwanga na mmongo wake Klistu.

⁸Lilaledye kwambangidya hashinanjaike ashilá shatukalalele namene madengo kanji pakulota mupate inudyo yakulinganana.

⁹Uti aijá ákapagwa nkati mumapundisho amwe Klistu kanji apundanianga anavo, ajo have Nnungu. Napane aijá ápagwa nkati mumapundisho, ankuvanavo Atata namomo kuvanavo Mwana.

¹⁰Ikava kenga munu wantindo au andaida kwenu pakaidanavo mapundisho ala, hamunampwashalele muding'ande dyenu na ata hamunamuudyange

¹¹mwaa aijá amuudyanga jo, nae ankuva munu áliinjidyanga namu nae muvitendo vyake vyaukalau.

¹²Ninkuvanavo vyoe vyakumwandikila mwenu kanji i kwalyamba na wino mwaa ninkulindila ngwide ninnole ngutwale ngutangole namu mwenu ing'ope kwaing'ope kwambangidya lipuwilo lyetu, liwikile popo.

¹³Vana vankuluvo wakutandalegwa,[2] vankuntumidya nandele.