Read Ibibiliya mu Shimakonde Imbodi Yaambi na dimbande dya Imbodi Yakala III Nshuwau 1 Bible Online

III Nshuwau 1 - Ibibiliya mu Shimakonde Imbodi Yaambi na dimbande dya Imbodi Yakala bible

III Nshuwau 1

¹Kwanang'olo kuka kumwe wakunagwaleka Gayu, aijá waninnagwaledya kwaumwiu.

²Wakunagwaleka, ninkushwali pakulota wako uvenavo shingumi shambone na vinu uti vikuukile shana, doni kenga mo mwaukila shana ungumi wako

³mwaa ndipuwanga namene pakuwika vanung'unumunu, pavaumidye ushuda wakupagwa wako muumwiu, kwakutangola mwiu unkuka mushu unama nkati muumwiu.

⁴Hanguvenavo lipuwilo likumene kupunda ali: lyakwigwa kenga vanavangu vankuwena muumwiu.

⁵Wakunagwaleka, ni shinu shakukulupilika shauvatandela vanung'unumunu kupunda namene avalá vaukavamanyite.

⁶Vanavo vandyumya ushuda muliganisha kwamwaa walinagwaledyo lyako. Wako undatenda shana ikava kenga undavapwashela shimwanda shave kwainamuna innagwéla Nnungu.

⁷Ni kwamwaa Walina litadídye vanavo vaume kwabila kupwashalela lipwashalelo lyoelyoe kwavamidi.

⁸Napavedoni indivaikila tuvapwashalele vanung'unumunu kenga ava pakulota tuve vamadengomwave nkati muumwiu.

⁹Ndyandikila liganisha: kanji Diotelepeshi munu ínannagwela namene ave nang'olo pakati pave, hanatwigwilila.

¹⁰Napavedoni pangulota kwida ako ndaundukulanga uti vyatenda, malove aukalau na akunyambikanga kwetu wetu. Nae avi havinantosha shinu, leka apo ankwita kuvapwashalela vanung'unumunu, kuvadivilila avalá valóta vavapwashalele na kuvavinganga muliganisha.

¹¹Wakunagwaleka, haunajedye ashilá shakunyata kanji ashilá shambone. Aijá átenda wambone, ajo wake Nnungu; aijá átenda wakunyata, ajo hamwanite Nnungu.

¹²Kanji napane kwaupande umwe Demetiliu uti vandyumya ushuda wambone na wo umwiu wene unkwing'a ushuda kwamwaa wake. Na wetu momo tunkumya ushuda na wako unkumanya kenga ushuda wetu, wìu.

¹³Ndívanavo vyoe vyakukwandikila kanji hangushilota ndikwandikile kwawino na kwalunduja

¹⁴mwaa ninkulindila ngwide shipajelo. Bai apo, tundaambanga mwaa ing'ope kwaing'ope.

¹⁵Amani ipagwe kwako wako. Vambodi va akuno vankuntumidya nandele. Vape nandele vambodi va ako jumo kwajumo.